Ilannguaq Esralu nersorniarneqarput
Politimesterip nersornartippaa Ilannguaq Josefsenip Esra Josefsenillu inuunertik ulorianartorsiortillugu allamik annaassiniarsimanerat
Qeqqani illoqarfiit pingaarnersaanni Sisimiuni Politiini ullumi tallimanngornermi nalliuttorsiorpaluttumik katerisimaarnermi Ilannguaq Josefsen Politimesterimit 1.000 koruuninik akissarsisinneqarpoq, 2012-imi septembarip 11-anni angutip allap inuuneranik annaassisimanera pissutigalugu.
Ajutoorneq pivoq Maniitsup avataani unnukkut kingusissukkut mallertorujussuulluni silarluttorujussuarmi angallammik ajutoornermi.
Ilannguup ajutoorneq tusaramiuk Esra Josefsen ilagalugu aallarpoq ajornartorsiortullu annaallugit.
Politimesterip pingaartissimavaa Ilannguup Esrallu iliuuseqarnermikkut aalajangeriataarnermikkullu ingerlaannaq aallarsimammata, inuunertillu ulorianartorsiortillugu ajornartorsiortup inuunera annaallugu.
Esra Josefsen siusinnerusukkut Maniitsumi politeeqarfimmi nalliuttorsiorpalaartumik katerisimaarnermi checkimik 1.000 koruuninik aningaasartalimmik akissarsisinneqarpoq.
