Ukiukkut tuttunniartoqassanngitsoq inassutigineqarpoq
Pinngortitaleriffiup politikerit siunnersorpai 2013-imi 2014-imilu tuttunniarnissat umimmanniarnissallu iluarsiivigeqqullugit
Pinngortitaleriffimmi biologit ukiuunera naallugu tuttunniartoqannginnissaa inassutigaat.
Taamatuttaaq umimmanniartoqassanngitsoq inassutigineqarpoq, taamaallaat Kangerlussuup-Sisimiut eqqaanni pinnagu. Biologit inassutigaat tamaani januaarimi/februaarimi umimanniarneq ingerlaannarsinnaasoq. Tuttunniarnermut umimmanniarnermullu inassuteqaatit inuussutissarsiutigalugu piniartunut aliikkutaralugulu piniartunut atuuttariaqarpoq.
Ukiukkut piniartarnermik aaqqissuussineq ukiut qulerpiaat matuma siornatigut eqqunneqarpoq, pingaartumik Kitaani tuttut amerleriarujussuarsimammata. Maanna kitaani ingerlatsiviit amerlanersaanni tuttut ima ikileriarsimatigipput naasut nersutit nerisaat tunngavissarissaarnerulersimallutik.
Tuttunniarnermulli umimmanniarnermullu nangaassuteqartoqarpoq, tassa siuliani inassuteqaatit tammajuitsorniarluni piniarnermik aaqqissuussinerput atuutsinniarneqanngimmata. Biologit naliliipput maanna tammajuitsorniarluni piniartarnermi nersutit akornusersorneqartarnerat ima annikitsigisoq, tamanna ajoqutaassanani.
Qaanaap avannaani, Inglefield Landimi/Prudhoe Landimi aamma Olrik Fjordimi, tuttunniarnermut nangaassuteqaat alla tassaavoq, tamaani ukiuunerani piniarneq nalileqqinneqarsinnaasoq tamaani piniartut isumasioqatigalugit, assersuutigalugu piffissat piniartarfiit allanngortinneqarsinnaallutik. Taamatuttaaq nangaassuteqartoqarpoq ingerlatsivinni Inglefield Landimi, Kap Athollimi, Jameson Landimi, Indre Scoresbysund Fjordimi Ivittuumilu ukiuunerani umimmanniartarnermut.
Tamatuma saniatigut biologit nalinginnaasumik inassuteqaataat atuupput: tuttut umimmaallu tiggaat kulavaallu amerlaqatigiissut piniarneqartarlik, eqqaamallugulu piniarnermi nalunaaruteqartarnermut immersugassat immersorneqarnissaat. Tamakkua pingaaruteqartorujussuupput ingerlatsivinni assigiinngitsuni nersutit amerlassusaannik eqqornerusumik biologit takunnissinnaaqqullugit.
Aalisarnermut, piniarnermut nunalerinermullu naalakkersuisoqarfiup pinngortitaleriffik qinnuigisimavaa 2013-imut 2014-imullu tuttunniarnermut umimmanniarnermullu inassuteqaatini nalileqqeqqullugu. Tuttuttassat umimmattassallu amerlassusissaat Naalakkersuisut aalajangertarpaat, aalisarnermut, piniarnermut nunalerinermullu naalakkersuisoqarfiup qinnuteqaatai malillugit.