Royalty assallannialerpaat
Inatsisartut aatsitassanut ataatsimiititaliaat isumasioqatigiinniarpoq royalty pillugu periutsit arlallit saqqummiunneqassallutik
Isumaqatigiissutaareerpoq aatsitassat Nunatsinniit anninneqartut tamarmik royaltymik akitsuuserneqartassasut. Sulili aalajangiunneqanngilaq akitsuuseeriaaseq qanorpiaq isikkulerlugu atulersinneqassanersoq. Aatsitassat pillugit ataatsimiititaliaq sapaatip akunnera tulleq Nuummi katersuutissaaq tamanna sammivinnit assigiinngitsuniit oqaluuserissallugu.
- Royaltyp atuutilersinnissaanut periarfissat arlaqarput. Kisianni mianerisariaqarpoq suliffeqarfiit pileriunnaarsissannginnatsigit, aatsitassat pillugit ataatsimiititaliap siulittaasua Kim Kielsen, Siumut, Sermitsiaq.AG-mut oqarpoq.
Aatsitassat pillugit ataatsimiititaliaq ataasinngorneq maajip arfernaniit isumasioqatigiinniarpoq tassanilu royalty pillugu periutsit assigiinngitsut saqqummiunneqassapput.
Soqutiginninneq annertusiartorpoq
Siumup Atassutip Partii Inuillu Naalakkersuisooqatigiinnissamik isumaqatigiissutaanni royaltyp atulersinneqarnissaa allassimavoq. Sulili isumaqatigiissutigineqanngilaq qanorpiaq ilusilerlugu tamanna atuutilersinneqassanersoq.
- Ullumikkut suliffeqarfiit iluanaarutit 30 procentiinik akileraartussaatitaapput. Periarfissat ilatigisinnaavaat royaltymik akiliinermi akileraarutissap appartittarnissaa. Taamaasilluta aatsitassat Nunatsinniit anninneqartut piaarnerusumik isertitsissutigisalissavagut, Kim Kielsen oqarpoq.
Aatsitassarsiornermi suliffeqarfiit assigiinngitsut misilittakkanik kissaatinillu saqqummiussinissamut periarfissinneqassapput ulluni pingasuni isumasioqatigiinnissami.
- Nunani allani royaltymik atuiffiulereersuni misilittakkat tusarusuppagut. Aamma tusarusupparput avataaniit soqutigineqarnerput innarlinngikkaluarlugu royalty qanoq ililluta atulersissinnaanerlugu. Suliffeqarfiit iluanaarutinik akileraarutaat ukiuni arlaqalersuni 30 procentiuvoq taamaakkaluartoq aatsitassaatitta soqutigineqarnerat annertusiartorpoq soqutiginninnerullu attatiinnarnissaa qulakkeerniartussaavarput, Kim Kielsen oqarpoq.
Taassuma Sermitsiaq.AG-mut erseqqissarpaa uani isumasioqatigiinnissami periutsit arlaat atulissanersoq isumaqatigiissutigineqarnavianngimmat. Immersoqatigiinnissaq uani pingaarnertut siunertaavoq.
- Ujaqqat tamarmik assallanneqareerpata aatsaat aalajangertoqarumaarpoq, Kim Kielsen oqarpoq.