Skip to main content

Kalaallit Nunaat tassaavoq kuultisiortunut nuna neriorsuutigisaq nutaaq

Animal Planetimi TV-iikkut isiginnaagassiaq nangeqattaartoq 'Ice Cold Gold' Nuummi sisamanngornermi unnukkut takuteqqaarneqarpoq. Aallakaatitassiat nangeqattaartut imarisaat tassaavoq Kalaallit Nunaata Amerikamiunut kuultisiortunut tassaanera nuna neriorsuutigisaq nutaaq

Animal Planetip TV-iikkut aallakaatitassiaa nangeqattaartoq 'Ice Cold Gold' sisamanngornermi Nuummi Katuami inersuaaqqami takuteqqaarneqarmat Namminersorlutik Oqartussanit, Kommuneqarfik Sermersuumit, tusagassiuutinit peqataasunillu qaaqqusanut nal. 17.30 ilasseqatigiissitsisoqarpoq.

Animal Planetimi siulittaasup tullia Kurt Tondorf ammaalluni oqalugiarpoq nipilersortartullu Miki Jacobsenip ‘Inuit Nunaat’ aamma ‘The Future’ erinarsorpai.

TV-iikkut aallakaatitassianik nangeqattaartunik suliaqarnissamik isumassarsisoq suliarinnittorlu David Casey ukiut sisamat matuma siorna Kalaallit Nunaanniippoq. Taamani Nuup eqqaani tv-iikkut nangeqattaartuliornissaq isumassarsiaraa, aallaqqaammulli isumassarsiani pilersaarusiorsinnaajumallutik tv-eeqarfimmit akuerineqartinnagu Animal Planetimut isumassarsiaminik akuersititsiniaqqaartariaqarsimalluni.

- Maaneeqqaarama Kalaallit Nunaat asannilersoorfigaara, Kalaallit Nunaattut ittunik allanik nunaqanngilaq. Maani pinngortitaq alutornartorsuuvoq allanngorneqarpiaranilu.

Takutitsineq
Nal. 19 Hans Lyngep Inersuani akeqanngitsumik takutitseqqaartoqarpoq, inissallu tamangajalluinnarmik ulikkaarsimapput. 'Ice Cold Gold'-ip ilaa 50 minutsinik sivisussusilik kikkulluunniit takuniarsinnaavaat. Isiginnaarianit nangeqattaartuliaq ilassilluarneqarpoq - isiginnaartinneqarneratalu nalaani illartoqartarpoq takutinneqaqqaarneralu naammassimmat ersaartaanneqarluni.

Isiginnaagassiami nangeqattaartumi inuussutissarsiutigalugu kuultisiortut arfineq-pingasut nunami neriorsuutigisaasumi kuultimik, diamantinik rubininillu ujaasiartortut sammineqarput. Immiussineq Nuup eqqaani Qeqertarsuarmi sapaatip-akunnerini arfinilinni pisimavoq. Immikkoortut arfiniliupput.

TV-iikkut nangeqattaartuliami Kalaallit Nunaat pitsaanerpaamik takutinneqarpoq pinngortitami assilisat kusanartut alutornartorsuillu peqataasullu sapiissuseqarluartut ilanngullugit.

Immikkoortoq siulleq juulip 17-iani Discovery Channelimi takutinneqassaaq. Kanali Animal Planetimit pigineqarpoq. Isiginnaartussatut siunnerfigineqartut tassaapput Amerikamiut isiginnaartartut Kalaallit Nunaat pinngortitarsuarlu tassaniittoq pillugu ilisimasaqanngitsut.

Amerikamiut kalaallillu
Immiussinermut peqataasut tassaapput aallakaatitassiortoq, kuultisiortut arfineq-pingasut, assiliisut arfineq-marluk allallu assigiinngitsunik akisussaaffillit. Kalaallit sisamat ikiuupput, assersuutigalugu Malik Hegelund igasuuvoq.

Malik Papis tv-iiliortunut angallassisuuvoq tamalaanillu suliaqartartuulluni.

- TV-iiliortunut siornatigut Kalaallit Nunaanniissimanngitsunut angallassisuuneq unammilligassaavoq. Nunatsinni pinngortitaq alutornartorsuaq Amerikamiunut nittarsaassinnaagakku immikkut pisinnaatitaaffeqartutut misigisimavunga. Misigisaavoq inuunermi puigugassaanngitsoq.

Taamaattumik Kalaallit Nunaat
Immikkoortoq siulleq apriilip 21-ani USA-mi Animal Planetimit takutinneqarmat isiginnaartartunit 800.000-it isiginnaarneqarpoq.

Sooq Kalaallit Nunaata toqqarneqarsimanera Animal Planetimi pisortap tulliata Kurt Tondorfip oqaluttuaraa:

- Anguniagarput tassaavoq sumiiffinnik isiginnaartartutsinnit takuneqanngisaannarsimasunik takutitsinissaq. Kalaallit Nunaat Amerikamiorpassuarnit ilisimaneqanngilaq. Naluaat qanoq isikkoqarnersoq, naluaallu inunnik najugaqarfigineqartoq. Isiginnaartartut immikkuullarissumik misigisassaqartikkusussimavakka.

Animal Planetip nunatsinni tv-iikkut nangeqattaartulianik allanik immiusserusunnera David Caseyip qularinngilaa:

- Kingullermeerluta maaniinnginnerput qularinngilluinnarpara. TV-iikkut aallakaatitassianik nangeqattaartunik suliaqariartorlunga tikeqqikkusuppunga. 'Ice Cold Gold'-ip 2-p suliarinissaa Animal Planetip soqutigilereerpaa. Tamatumuuna pinngortitaq Kalaallit Nunaannilu piorsarsimassuseq ataatsimoortinneqassapput.

Kuulti utertippaat
Kuultisiortut kuultiminernik marlunnik nassaarput. Nassaat tamarmik Namminersorlutik Oqartussanut tunniunneqarput. 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER