Aleqa: Ersoqatigiinneq ataatsimuussuserlu aqqutissaapput
Naalakkersuisut siulittaasuat Aleqa Hammond Sisimiuni maajip aallaqqaataani oqalugiarpoq
Qeqqata Kommuniani borgmester Hermann Berthelsen, Siumut peqatigalugu Naalakkersuisut siulittaasuat Aleqa Hammond, Siumut Sisimiuni maajip aallaqqaataani oqalugiarpoq.
Maajip aallaqqaataani oqalugiaammini Aleqa Hammondip arlaleriarluni ersoqatigiinneq ataqatigiinnerlu oqaatigisarpai:
- 1. maj tassaavoq nunani tamalaani ersoqatigiinnermik ataatsimuussutsimillu kissaateqartut tamarmik nalliuttorsiorfiat. Ukiut tamaasa ulloq taanna qilanaarisarpara pissutigalugu ersoqatigiinneq ataatsimuussuserlu tassaammata politikkikkut sulininni aallaaviusut.
Tassami annertuumik suliffissaarusimaneq aningaasarliornerlu qaangerniassagutsigit, taava ersoqatigiinneq ataatsimoornerlu pisariaqartippagut.
Aningaasatigut naligiinngitsumik inissisimaneq annikillisissagutsigu taava ersoqatigiinneq ataatsimoornerlu pisariaqartippagut, Aleqa Hammond oqaluttarfimmit oqarpoq.
Erseqqissaatigaa tamanna tunngavigalugu Naalakkersuisut nutaat pilersinneqarmata.
Siumumi ersoqatigiinneq ataatsimoornerlu oqaasiinnaanngillat – tassaappulli qinigaaffimmi matumani naalakkersuinikkut suliassami tigussaasumik siunnerfiit
- Isumaqarpugut ataatsimut kivitseqatigiikkutta annertunerpaanik angusassaqartugut.
- Taamaattumillu naalakkersuisunngoqatigiit isumaqatigiissutaat qulequtserneqarpoq ”Nuna ataasiusoq – Inuiaat ataatsimoortut”. Tamatumanilu pitsaasunik tigussaasunillu tunngavissarpassuaqarpoq.”
Innuttaasut qitiutillugit
- Suliniutinik ullumikkorpiaq suliassaqartitsilertussanik aallarniinikkut suliffissaaleqineq akiorusupparput.
- Sanaartugassat nunatsinnut tamarmut agguataarnerisigut nunarput tamakkerlugu ineriartortikkusupparput – illoqarfinnilu minnerni nunaqarfinnilu aalisakkat tunisat annertusitillugit.
- Praktikkerfissanik ilinniartullu inissiaannik pitsaasunik qulakkeerinninnikkut inuussutissarsiutitigut ilinniagaqarfinni ilinniartunut atukkat pitsanngorsarusuppagut. Inuusuttut qaamasumik siunissaqarlutik nalunagu ullaakkut makittarnissaat pingaaruteqarpoq.
- Piffissami aggersumi aatsitassarsiornikkut ingerlassanik ineriartortitsinissatsinni innuttaasut qitiutinneqassapput, tamannalu kikkulluunniit peqataanissaminnut tusarneqarnissaminnullu periarfissinnerisigut ingerlatissavarput
Uranitalinnik piiaaqqusinngilluinnarnerup atorunnaarsinnera
- Tamannalu aamma aatsitassat piiarneqartut uranitaqanngilluinnarnissaannik piumasaqaammik atorunnaarsitsigutta aammattaaq atuutissaaq. Innuttaasut pitsaasumik peqataasinneqarnissaat qulakkiissavarput, tamannalu avatangiisit ataatsimoorussatta, sillimaniarnerup pitsaasup tamattalu peqqinnissatta ataqqinerisigut pissaaq, Aleqa Hammond oqarpoq.
- Tamannaavoq inuiaqatigiit oqimaaqatigiissut pilersinnissaannut malitassarput. Aammalu inuiaqatigiit namminersortut kiffaanngissuseqartullu, kulturitsinnik aallaaveqarlutik neriulluartut nutartertullu angutserlugit malitassarput.