TV: Politikerit neriorsuutaat

Ingerlatsivimmi East Greenland Oil-imi soqutigisaqarneq. Ingerlatsivimmi Aurora Oil-imi soqutigisaqarneq aatsitassarsiornissamut ajunaarutaasinnaasunik aningaasaliinissamut piumassuseqarneq. Pingaartumik minnerunngitsumillu Greenland Resourcesimik piginneqataallunilu pilersitseqataaneq - ingerlatseqatigiiffiup Greenland Minerals and Energyp ataani.

Ingerlatseqatigiiffiit Inatsisartut siulittaasuata Lars-Emil Johansenip Siumumeersup suli peqataaffigisai. Tamakku qinersisartunit ilisimaneqanngillat, marsip aqqaneq-aappaani taassuma aqqata nalaani krydsiliigamik. Lars-Emil Johansen nunatsinni ataatsimiitartut pingaarnersaannut siulittaasunngortinneqarami taassuma inuussutissarsiornermi soqutigisai eqqaaneqanngillat.

Aatsaat qallunaat aviisiata Berlingskep sapaatip-akunnerata matuma siorna Lars-Emil Johansenip inuussutissarsiornermik suliaqarneranik apeqqutilliimmat tamakkua saqqummiussuunneqalersut. Tassunga atatillugu ingelatsivinni peqataaffigisaminik unitsitsiniarluni oqarpoq, uppernassusilimmik sullissinissani qularutigineqassanngimmat.

NGO-tut atuuttoq Transparency Greenland tamakkua pinaveersaarniarlugit suliniuteqarpoq. Peqatigiiffiup erseqqissaatigiuarpaa politikerit inuussutissarsiornermik ingerlataminnik saqqummiusseqqullugit - kiisalu taakkua aappaasa inuussutissarsiornermi soqutigisaat. Ingerlatsivinnit annerusumik ammasuunissaq kissaatigineqarpoq.

Pissaanermik tigummiaqalersut inuit arlallit qineqqusaarnerup nalaani Transparency Greenland oqariartuutaanik isumaqataapput.

Tamanna saqqummerpoq peqatigiiffiup marsip sisamaanni qinersisartunik Nuummi Katersortarfimmi ataatsimiititsinerani. Tassani peqataapput ilaatigut Steen Lynge, Atassut, Sara Olsvig, Inuit Ataqatigiit, Jens-Erik Kirkegaard, Siumut, Jens B. Frederiksen, Demokraatit, Anthon Frederiksen, Kattusseqatigiit Partiiat aamma Nikku Olsen, Partii Inuit.

• Aatsitassanik, aalisarnermik aamma meeqqatta nunaqarfiillu siunissaat pillugit aalajangiinerni pingaarutilinni innuttaasut peqataatinneqassappat?
• Ilisimatinneqaannarata ilisimatippallaaginnarneqaannaratalu tusaaniarneqassaagut?
• Qanoq isilluta qulakkeersinnaavarput politikerit pisortallu aalajangiussaminnik pilersaarutiminnillu ammasuunissaat?
• Qanoq isilluta qulakkeersinnaavarput sianiinnaarineq peqquserluttuliornerillu akisussaasunit akisussaatinneqarnissaat?
• Qinersisartunik ataatsimiititsinernit vidoelianit marlunni politikerit akissutaat takuneqarsinnaapput - naliliillutillu tamatuma kingorna oqaatsiminnik eqquutsitsisimanersut.
• Nukissavut aallaavigalugit videoni aaqqissuullugillu allagartartalersorsinnaasimanngilavut, kalaallit oqaasii annermik atorneqarput.

• Videot marlunnik immikkoortoqarput. Qinersisartunik ataatsimiisitsinermi unikkallarnerup siorna unikkallarnerullu kingorna immiussaallutik. Immikkoortoq siulleq takusinnaavat qulequtaatigut toorsinikkut.

Immikkoortup aappaa una toorlugu takusinnaavat