Kalaallit Illutaat pisortartaarpoq
Nunat avannarliit piorsarsimassutsikkut attaveqaataanni pisortaq Leise Johnsen Københavnimi Kalaallit Illuutaanni aasap kingorna pisortanngussaaq
Kalaallit Illuutaanni pisortaq Inger Bruun soraarninngortussanngorpoq Kalaallit Illutaannut attuumassutilimmik ukiut 40-ngajaat sulereerluni. Inger Bruunip kingoraartigissavaa Leise Johnsen Nuummi NAPAmi ullumikkut pisortatut atorfeqartoq.
Atuaruk: Inger Bruun tunuarpoq
49-nik ukiulik Leise Johnsen septemberip aallaqaataani atorfittaaminut nuussaaq NAPA-mi pisortatut atorfik 2009-p naalerneranili atorfigisani qimassallugu. Tamatuma siorna Tele-mi aamma Arktisk Institutimi atorfeqartarsimavoq.
Inerisaanissaq
Maanna suliat Nunatsinnut attuumassuteqartut Københavnimiit ingerlattussanngorpai.
- Assorsuaq qilanaarpunga sulisut, suleqatit, siulersuisut aamma atuisut suleqatigalugit attaveqatigiinnerit suliniutillu inerisaqqinnissaannut, Leise Johnsen oqarpoq.
Løvstrædemi Kalaallit Illutaat 1974-mi atulerpoq Dronning Margrethe illersuisoralugu tassanilu saqqummersitsinerit aaqqissuussinerillu allat pisarput.
Aamma paasissutissiisarfeqarpoq, ilinniartunut siunnersuisarfeqarluni aammalu inunnik isumaginninnermi ammasumik siunnersuisarfeqarluni.