Sap. ak. 18 Narsami aallartippaat
Sapaatip-akunnerani inuit peqqissusaannik isiginiarfik aallartillugu, ataasinngornermi unnukkut Kujataani illoqarfimmi arpattoqarpoq
Sapaatip-akunnera 18 ataasinngornermi aallartillugu Narsami timigissarluni arpattoqarpoq arpattartut peqatigiiffiata Narsami Arpattartut aaqqissuussaat.
Sapaatip-akunnerisa 18-iuneranut tulluarluinnartumik arpaqataasut 18-iupput, arfineq-marlunnit 70-inut ukioqarrallutik.
Aaqqissuisut neriuutigisimagaluarpaat inuit amerlanerit takkunnissaat peqataasulli amerlagisassaannginnerannut silap nillernerujussuaq peqqutaasimagunarluni.
Arpaffiit marlunnik takissuseqarput, ataaseq 3 kilometerinik takissusilik ataaserlu 5 kilometerinik takissusilik - takissutsit tamarmik qulingiluanit peqataaffigineqarput.
3 kilometerimi Bolethe Egede ajugaavoq, Heidi Kielsen tullersortaalluni taannalu Ane Elise Petersen pingajuulluni apuuttoq.
5 kilometerimi Arkalorak Olsvig ajugaavoq ataataminit Abia Ottosenimit malitseqarluni. Pingajulluni apuuppoq Naalu Kleist.
Arpanneq naammassimmat arpattut imermik naatsitanillu sassaallerfigineqarput.
Sapaatip-akunnerisa 18-iat Kalaallit Nunaanni inuit peqqissusaat immikkut isiginiarneqartarput pingaartumik imigassaq imeriaatsillu isiginiarneqartarlutik. Ukioq manna oqaariaaserineqarpoq 'silaarunnani aalakoorneq'.