Tele-Post ulapippoq

Tussiarfissuaq sioqqullugu Sisimiut kujataani attaveqaatit tamarmik unittoorput. Amerlanerpaat ingerlaqqilerput, Tele-Post paasissutissiivoq

Sisimiut kujataani attaveqaatit pilerseqqinneqalerput. Ass.: Tele-Post

- Teknikerivut ippassaq unnukkut Nuummit Aasiannut tikipput atortullu ajoqusersimasut ingerlaannaq taarsersulerlugit.

Taamatut Tele-Post tusagassiorfinnut nalunaarummi allappoq, tassani Sisimiut kujataani attaveqaatit unittoorsimasut iluarsaanneqarnerat killiffilersorneqarluni. Ilaatigut VHF-imi mellembølgemilu, MF, radiokut attaveqaatit unittoorsimallutik.

Unnuap qeqqata missaani VHF-ikkut attaveqaatit tamarmik, Arsuk kisimi pinnani, atuuteqqilerput, mellembølgemilu pingaaruteqarnerpaat ingerlaqqilerlutik.

Aamma atuaruk: Sisimiut kujataani radiokut attaveqaatit tamarmik unittoorput

- Teknikeritta arfininngormat ullaakkut qulingiluanut iluarsaassinertik nangeqqippaat. Ullumi sumiiffiit ataasiakkaat ataqatigiissarneqassapput. Tamatumunnga ullup ilarujussua atorneqassaaq, sumiiffiit ataasiakkaat tulleriiaarlutik nalinginnaasumik ingerlalissallutik.

Tele-Post Nuummit Air Greenlandimik angalasutut allatulli sisamanngormat tallimanngormallu anorersuarmit akornusersorneqarpoq, ulluni taakkunani timmisartuussinissat taamaatiinnarneqartarlutik kinguaattoorujussuartarlutillu.

Powered by Labrador CMS