Skip to main content

Inuusuttut pinerluttut qanoq pineqartarnerat siunnersuisoqatigiit paaserusuppaat

- Inuit pisinnaatitaaffii Kalaallit Nunaanni nalinginnaasumik ajunngitsumik malinneqarput. Unammilligassaqarporli. Taamatut oqarpoq Kalaallit Nunaanni Inuit Pisinnaatitaaffii Pillugit Siunnersuisoqatigiit siulittaasuat Hjalmar Dahl 

- Inuit pisinnaatitaaffii eqqarsaatigalugit maanna pinartumillu unammilligassatut takusinnaasavut ilaatigut tassaapput inuusuttut pinerluttut 18-it inorlugit ukiullit qanoq pineqartarnerat, oqaatsit eqqarsaatigalugit inuit pisinnaatitaaffiisigut unammilligassat inuillu innarluutillit ikiorneqartarnerat. Kissaatiginartipparput tamakkua pinartumillu unammilligassat allat isummerfigineqarnissaat, Kalaallit Nunaanni Inuit Pisinnaatitaaffii Pillugit Siunnersuisoqatigiit siulittaasuat Hjalmar Dahl oqarpoq.

Siunnersuisoqatigiit Nuummi siullermeertumik ataatsimeeqqammerput. Ataatsimiinnermi siunertaasimavoq Nunatsinni inuiaqatigiinni inuit pisinnaatitaaffiini piffissamut sivikitsumut sivisuumullu suliassat qulaajarnissaat suussusersinissaallu.

- Inuit pisinnaatitaaffii Kalaallit Nunaanni nalinginnaasumik ajunngitsumik malinneqarput, pissusissamisoortumilli unammilligassaqarpoq naammattunik. Taamaattumik ataatsimiinnermi nalilersimavarput pingaaruteqartoq Kalaallit Nunaanni inuit pisinnaatitaaffii pillugit piffissamut sivisuumut sivikitsumullu nuna tamakkerlugu iliuuseqarnissamut Naalakkersuisunut ikkuteqqammersunut siunnersuuteqarnissaq, Hjalmar Dahl oqarpoq nangillunilu:

- Unammilligassat takusinnaariikkatta ilagaat inuit pisinnaatitaaffiinik ilisimasaqarnissamik pisariaqartitsisoqarnera. Piffissamut sivisuumut iliuuseqarnissaq eqqarsaatigalugu Naalakkersuisunut inassutiginiarparput inuit pisinnaatitaaffii pillugit nalinginnaasumik ilinniagaqartitsinermik annertuumik aallartitsisoqassasoq, tamatumani ilanngullugu meeqqanut inuusuttunullu, ilinniagaqartunut inunnullu attuumassutilinnut. Ilanngullugu neriuutigaarput piffissaq ungasinnerusoq isigalugu Kalaallit Nunaanni Inuit Pisinnaatitaaffii Pillugit Institutimik pilersitsisoqarsinnaassasoq, taamaasilluni nammineerluta paasissutissat ilinniartitsisutissallu naleqqussarsinnaaniassagatsigik kiisalu inuiaqatigiinni inuit pisinnaatitaaffiini unammilligassanik misissuisarniassagatta, Hjalmar Dahl oqarpoq.

Naatsorsuutigineqarpoq nuna tamakkerlugu iliuuseqarnissamut pilersaarut Siunnersuisoqatigiit oktobarimi siullermik ataatsimiinneranni suliarineqassasoq, Kalaallit Nunaanni inuit pisinnaatitaaffii pillugit apeqqutinut immikkut toqqakkanut nalunaarusiaq, Danmarkimi Institut for Menneskerettigheder-imit (IMR) suliarineqarsimasoq, ilanngullugu.
- Qallunaat institut-iata nalunaarusiornera malinnaaffigaarput.

Piffissami aggersumi inuit pisinnaatitaaffii pillugit Siunnersuisoqatigiillu suliaat pillugit paasissutissiissummik quppersagaliortoqassaaq, taannalu Kalaallit Nunaanni inoqutigiinnut tamanut kiisalu oqartussaaffeqarfinnut suliffeqarfinnullu tamanut agguaanneqassaaq. Ilanngullugu quppernermik nittartakkamik sanasoqassaaq kiisalu ilisarnaammik unammisitsisoqassalluni, tassani Kalaallit Nunaanni kikkut tamarmik peqataasinnaallutik.


 

 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER