Aningaasaqarneq pillugu Maliina arfineq-marlunnik sakkortuunik apeqquteqarpoq
Naalakkersuisooqatigiinnissamik isumaqatigiissummi nunap aningaasaqarnera naalakkersuisooqatigiillu aningaasaqarnermut pilersaarutaat titarnernik pingasunik allaatigineqarpoq. Tamanna Aningaasaqarnermut Naalakkersuisuusimasup Maliina Abelsenip, IA, ernumanartoqartippaa
Naalakkersuisunit nalunaarutigiuminaatsippoq aningaasaqarnikkut unammilligassat qanoq iliuuseqarfiginiarneqarnersut. Aningaasaqarnermut pilersaaruteqarpasinngilaq, siunissami pigissaarnissamik qulakkeerinnittumik. Nunap aningaasaqarneranik Naalakkersuisut isumaliutaat tusassallugit nunap soqutigisarisariaqarpai.
Kalaallit Nunaata maanna siunissamilu aningaasaqarnera pillugu Maliina Abelsenip Naalakersuisunut apeqqutini arfineq-marluk taamatut tunngavilersorpai.
-Qitornavut atugarissaartillugit qimassanngikkutsigit siunissami atugarissaarnissaq qulakkeertariaqarparput. 2009-mut aningaasanut inatsit ingerlatsinikkut sanaartornikkullu annertuumik amigartooruteqarluni 2008-mi akuersissutigineqarpoq 2010-mut, 2011-mut, 2012-imut 2013-imullu Aningaasanut Inatsisit oqimaaqatigiinissaat naalakkersuisooqatigiiusimasut pingaartissimavaat, pingaartumik eqqarsaatigissagaanni aningaasaqarnikkut unalligassat suli erloqinarnerulissasut. Pingaaruteqartorujussuuvoq aningaasanik piginngisatsinnik ingerlatsinermut aningaasartuutinut atuinnginnissarput, taamaattumillu ernumanarpoq Naalakkersuisut maanna nalunaarmata aningaasanut inatsisinik amigartoorutilinnik suliniuteqartoqartoq, Maliina Abelsen allappoq.
Aningaasaqarnermut Naalakkersuisutut kingoraartiminut makkuninnga apeqquteqarpoq:
1. Aningaasaqarnermut Siunnersuisoqatigiit aamma Akileraarutinut Atugarissaarnermullu Ataatsimiititaliarsuup aningaasaqarnikkut inissisimanerput ersarilluinnartumik allaatigisimavaat. Ilaatigut takuneqarsinnaavoq ullumikkutut atugarissaartigiinnassagutta (pitsanngoriarneqanngitsumik) utoqqaallu amerliartuinnartillugit, 2040-p tungaanut ukiut tamaasa agguaqatigiissillugu ukiumut 1 milliardit amigaatigineqassapput.
Aningaasaqarnermut Siunnersuisoqatigiit aamma Akileraarutinut Atugarissaarnermullu Ataatsimiititaliarsuup kisitsisit saqqummiussaat suliallu Naalakkersuisut akueraat?
2. Naalakkersuisooqatigiit aningaasanut pilersaarummik saqqummiussaqarsimanngillat. Naalakkersuisut aningaasaqarnermut pilersaarummik saqqummiussissamaarpat, tassuuna nunap aningaasanik aqutsinera nassuiarlugu, qulakkeerlugulu siunissamissaaq atugarissaarnermut akissaqartoqassasoq? Taamaassimappat taava qaqugu naatsorsuutigisinnaavarput aningaasaqarnermut pilersaarut saqqummiunneqassasoq - ukiumoortumik Aningaasanik Aqutsibnermut Nalunaarutip saniatigut?
3. 2013-imi marsip 28-anni maanna Naalakkersuisut Siulittaasuat Politiken-imut imatut oqarpoq: »Isertitassanut isumassarsiaqarpugut maannakkorpiaq tusagassiorfinnut saqqummiussinnaanngisatsinnik, ilami suli sulilinnginnatta«. Naalakkersuisut maanna oqaatigisinnaanerlugu isertitassat suut ilisimaneqanngitsut eqqarsaatigineqarnersut?
4. Aningaasaqarneq ataqatigiissinniarlugu Naalakkersuisut isumaginninnikkut, ineqarnikkut utoqqalinersiaqarnikkullu aaqqissuusseqqinnissamik pilersaaruteqarpat. Taamaasimappat sunik qanorlu iliorluni?
5. Partiit naalakkersuisooqatigiit neriorsuisimapput kikkunnut tamanut utoqqalinersiat assigiissuussasut, inoqutigiit aningaasarsiaat apeqqutaatinnagit. Taamaasilluni utoqqalinersiaqarnikkut pilersuisuunissamik pisussaaffeqaqatigiinneq atorunnaarsinneqarpoq. Naalakkersuisooqatigiinnissamik isumaqatigiissummi imatut allassimasoqarpoq: »Utoqqalinersiaqarnermut aaqqissuussineq ineriartorteqqinneqassaaq, taamaasilluni utoqqalinersiat annertussusaat aallaaveqassanani katissimanerluni aappaqarnerluniluunniit, inuulli naleqassusianik aallaaveqassalluni.« Kalaallit Nunaanni utoqqalinersiallit siusinaartumillu utoqqalinersiallit, allamik aningaasarsiaqarnerat inoqutigiillu aningaasarsiaat apeqqutaatinnagit, tamaasa assigiissumik utoqqalinersiaqartinnerat ukiumut 80 millioner koruunit missaannik akeqassaaq - takuuk Siumup siunnersuutaa naatsorsugaalu 2009-meersoq.
Tamanna Naalakkersuisoq qanoq aningaasalerniarpaat, ullumiinnaanngitsoq aammattaarli ukiut 5allimat qulillu 20-llu qaangiuppata?
Aningaasat sumit tiguneqassappat?
6. Naalakkersuisooqatigiinnissamik isumaqatigiissummi allassimavoq: "Inuiaqatigiit aningaasaqarnerat aqunneqassaaq akisussaassusilimmik aalajaatsumillu."
Naalakkersuisut aningaasanik akisussaassusilimmik ingerlatsinertut isigaat, ingerlatsinermut missingersuummi nalinginnaalluinnartumi amigartooruteqarniarneq - eqqarsaatigissagaanni siunissami oqimaaqatigiissiniarnissaq ajornannginnerulissanngitsoq, ajornarnerulissallunili?
7. Nalinginnaasumik ingerlatsinermut missingersuummut atatillugu aningaasanut inatsimmik oqimaaqatigiissumik Naalakkersuisut suliniuteqassamaarpat?