RAL ukiorlussiortoq

Royal Arctic Line ukiuni kingullerni arlalinnik unammilligassaqartarsimavoq ingerlatseqatigiiffiup angusarisartagaannut pitsaanngitsunik sunniuteqartartunik.

Tamatuma kingunerisaanik ukiumi angusatigut akileraarutit ilanngaatigereerlugit 6 mio. kr.-iinnarnik sinneqartooruteqartoqarpoq. Ukiup naatsorsuiffiusup aallartinnginnerani naatsorsuutaasimagaluarpoq ukioq naatsorsuiffik qaangiuppat sinneqartoorutit, akileraarutit peernagit, 30-35 mio. koruuniunissaat.

Ingerlatseqatigiiffik ikkarlinnernik marlunnik P&S Werftenillu umiarsuarnik pisiffigineqartussatut isumaqatigiissuteqarfigisimasap akiliisinnaajunnaarneranik nalaattaqarsimavoq. Naalakkersuisut qularutiginngilaat ingerlatseqatigiiffiup taamatut pisoqaqqinnginnissaa sapinngisartik tamaat 2013-imi pinngitsoortinniarsarissagaat.

Royal Arctic Line A/S ingerlatseqatigiiffit assartuinermik ingerlataqartartut innuttaasunut inuussutissarsiuteqartullu aningaasartuutigisartagassaannik sinaakkutassaannillu aalajangersaaqataasartut ilagaat. Ingerlatseqatigiiffimmi aningaasartuutit 2012 –imi qaffariarujussuarsimapput. Taamaattumik Naalakkersuisut naatsorsuutigivaat ingerlatseqatigiiffimmut aningaasartuutaasartut qaffakkiartornerisa tunisassiornerup ineriartortinneqarneranut malinnaatinneqarnissaat. Ingerlatseqatigiiffimmi aningaasartuutaasartut ineriartorneri Naalakkersuisunit ukiuni aggersuni malinnaaffigineqassapput.

Siulersuisut allannguuteqaratik ingerlaqqipput, tassaallutik:

• Martha J. M. N. F. Labansen (Siulittaasoq)

• Kristian Frederik Lennert
• Tanja Nielsen
• Bent Østergaard
• Ole Frie
• Efraim Tittussen (Sulisut toqqagaat)
• Jens Peter Berthelsen (Sulisut toqqagaat)
• Marianne Ingrid Hansen (Sulisut toqqagaat)