Bjerregaard SIK’p pisortanut nersornaasiuttagaanik nersornaaserneqarpoq
SIK'p siulittaasuata Jess G. Berthelsenip Hotel Arcticimi pisortaq Erik Bjerregaard nersualaarpaa akunnittarfeqarnikkut neriniartarfeqarnikkullu kalaallinik inuusuttunik ilinniartitsinera pillugu
Sulinermik inuussutissarsiuteqartut kattuffiata SIK’p pisortanut nersornaasiuttagaa immikkut ittoq pingasunngormat unnukkut Ilulissani Hotel Arcticimi pisortamut Erik Bjerregaardimut Ilulissani ilasseqatigiinnertalimmik tunniunneqarpoq.
Kattuffiup siulittaasua Jess G. Berthelsen tunniussinermini oqarpoq SIK'p suliaq annertooq nersorniaraa. Erik Bjerregaard maligassiuinermigut suliffeqarfik ingerlalluartoq pilersippaa annerusumik nunaqavissunik kalaallinillu sulisoqarluni:
- Erik illit maani nunatsinni ukiorpassuarni sulininni kajumissaareqataasimavutit nunaqavissut ilinniarnissaannut pikkorissarnissaannullu taakkununnga taamaallaat iluaqutaanngitsumik nunatta inerniartorneranut tamarmu, Jess G. Berthelsen oqarpoq.
Erik Bjerregaard qujassuteqarluni oqaaseqarnermini SIK-p pisortanut nersornaasiuttagaanik tunineqarnini nuannaarutigalugulu tulluussimaarutigigini, Ilulissanilu Air Greenlandip akunnittarfiutaanut nunatsinnilu akunnittarfeqarnikkut neriniartarfeqarnikkullu sulisunik pikkorissunik ilinniartitsinini nanginniarlugu.