Ilinniarfik: Ajoqut pereerpoq
Innaallagisserinermi klasse ilivitsoq Nuummi Saviminilerinermik Ilinniarfimmi angusinngitsooreersoq isornartorsiuineq ilinniarfiup tusaatissatut tiguaa. Ajornartorsiulli meeqqat atuarfianiinnerarpaat tamannalu ilinniarfinni eqquinerluttarpoq
- Ajornartorsiut nassuerutigisariaqarparput oqaatigalugu meeqqat atuarfiat ajornartorsiuteqartoq. Ataatsimoorluta aaqqiissutissanik nassaarniartariaqarpugut, Nuummi Saviminilerinermik Ilinniarfimmi siulersuisut siulittaasuat Alex Nørskov Sermitsiaq.AG-mut oqarpoq.
Nuummi el-installatørit ippassaq pingasunngornermi nipangiusimaannarsinnaajunnaarpaat klassep ilivitsup innaallagisserinermi decemberimi angusinngitsoorsimanera. El-installatørit isumaqarput ilinniarfimmi ilinniartitsisut piginnaasaat qaffasinnerusariaqaraluartut.
- Tassa ilumoorpoq klassep ilivitsup innaallagisserinermi angusinngitsoornera. Ajoraluartumik akulikippallaamik naammattoortarparput ilinniartunngortut piginnaasamikkut inorsartarnerat. Taakku angummatsinniarlugit nukippassuit atorneqartarput ilaatigullu ilinniartut allat eqqornerlunneqarsinnaasarput, Alex Nørskov oqarpoq.
Atuaruk: Klasse tamarmi angusinngitsoorpo
Atuaruk: Meerarpassuit siunissaat ajorpoq
Ajoqut pereerpoq
Ilinniartitsisut peqatigiiffiata Imakip aamma inuussutissarsiortut meeqqat atuarfiat ingerlanerluppallaarnerarlugu uparuarpaat. Ilinniartitsisut isumaqarput soraarummeernermi angusarlunnerup inuusuttorpassuit siunissat sequtseraa.
- Allatut ajornaqaaq ataatsimoorluta aaqqiissutissanik ujarlertariaqarpugut ajornartorsiullu nassuerutigalugu. Ajoqut pereersoq iluarsiniaannarsinnaanngilarput. Meeqqat atuarfiata piukkunnarluartunik soraarummeersitsisarnissaata qulakkeernissaa oqaluuserisariaqalerparput, Alex Nørskov oqarpoq.
Nuummi el-installatørit oqaatigaat elektrikerinngorniaat affaat tikillugit angusinngitsoortalersut.
- Inuusuttut matematikimi, qallunaatoornermi aamma tuluttoornermi piginnaasaat appasippallaarput, Alex Nørskov oqarpoq.