Akitsuutit pillugit IA-mit apeqquterpassuit
Akitsuutit pillugit apeqqutit 16-it Inuit Ataqatigiinni Maliina Abelsenip Naalakkersuisunut apeqqutigai
Marsip ulluisa aqqaneq-aappaani Inatsisartunut inatsiliortuusunut qinersereernerup kingorna maannakkut ulluinnaat aatsaat iluamik aallartilerput.
Qinersinermi angusat ilaatigut ilisimaneqartutut kingunerisaannik Maliina Abelsen, Inuit Ataqatigiit, Aningaasat pillugit Naalakkersuisunut ilaasortaajunnaarpoq. Taarsiullugu Inatsisartuni ilaasortanngorpoq, tamannalu akitsuutit pillugit paragraf 37 naapertorlugu apeqqutitigut 16-isutigut ullut suliffiusut qulit ingerlaneranni Naalakkersuisunit akineqartussatigut takuneqarsinnaavoq.
Maliina Abelsen ilaatigut imatut aperivoq:
· Qaqugu Naalakkersuisut aatsitassarsiornermi akitsuusersuinermik inatsisit atuuttut
aqqutigalugit inatsimmik allannguutissamik saqqummiussiniarpat?
· Inatsisit atuutereersut sorliit atorneqarniarpat? Akileraartarnermut inatsit
atorniarneqarpat, imak paasineqassava aatsitassat tamarmik nunatsinniittut
taamatut tunisassiornermi akitsuuserniarneqartut??
· Naalakkersuisut nunami isumaqatigiissutaasumik aatsitassarsiornermi akitsuusiisarnermi periusissaqarnissaa ajunngitsutut isigaat? Naalakkersuisut aalajangersimasunik patajaatsumillu sinaakusiinissaq, ingammik nunatta aatsitassarsorfittut
inissisimannginnerani ajunngitsutut isigaat?
· Naalakkersuisut aatsitassarsiortut tunisassiornermi akitsuusiinernerup ilusilersornissaanut peqataatinniarpaat? Taamaassimappallu qanoq?
Taamaattumik aperisoqarpoq
Maliina Abelsenip apeqqutigisami tunuliaqutai ilaatigut tullinnguuttunik makkuninnga nassuiaasersorpai:
- Aatsitassat pillugit periutsit 2014-imi allanngortinneqartussaapput kisiannili 2010/2011-mili aatsitassanik suliffissuaqaleriasaarsinnaaneq qanoq akileraarusersorneqassanersoq pillugu isumaqatigiinngittoqalereerpoq.
Isumaqatigiinnginneq tamanna nalinginnaasumik oqallinnermi aamma marsip ulluisa aqqaneq-aappaani Inatsisartunut qinersinissap tungaanut imartusimaqaaq. Akileraarusersuinerit qanoq sunillu allanngortinneqarnissaat pillugu akissutit ersarissut pissarsiariuminaassimapput. Aatsitassat tamarmiusut 10 procenterissagaat ilaatigut oqaatigineqarpoq. Kisianni naalakkersuisooqatigiit aamma Naalakkersuisut aatsitassanik akileraarusersuinissaq aamma suliassaqarfimmut aatsitassanut nalinginnaasumik tunngasumut qanorpiaq kissaateqarnersut paatsuuganartorujussuanngorsimavoq.
- Inuit amerlanerit nunami qanoq pisoqarnissaa pillugu toqqaannartumik paasissutissanik amigaateqarneq nalorninerlu aningaasaliisartunut ajoqutaasoq isumaqarunarput – nunami sumiikkaluaraanniluunniit apeqqutaatinnagu. Naalakkersuisooqatigiinnissaq pillugu isumaqatigiissummi qanittukkut saqqummiunneqartumi naalakkersuisooqatigiit suniarnersut aamma paasiuminaappoq, Maliiina Abelsen erseqqissaavoq.
Apeqqutit 16-it filimi matuma ataaniittumi tamaasa takukkit: