Polar Seafood aatsaat taama angusarissaartigisoq
2012-ip suliffeqarfimmut ajunngilluinnartuusimanera ukiumoortumik nalunaarusiami takutinneqarpoq. Taamaattorli 2013-imi malunnaatilimmik appasinnerusumik angusaqarnissaq Polar Seafoodimit ilimagineqarpoq
Akileraarutit suli ilanngaatiginagit sinneqartoorutit 203 millioner koruunit akileraarutillu ilanngaatigereerlugit 151 millioner koruunit.
Polar Seafoodip 2012-imi ukiumoortumik angusai kusanartut taamaapput.
Aningaasat kaaviiaartitat 7,8 procentii sinneqartoorutaapput, taakkualu naalagaaffeqatigiinnermi suliaqarfiup iluani suliffeqarfiit akornanni qaffasinnerpaat akornanniipput. Polar Seafood taamaalilluni tassaavoq Kalaallit Nunaanni ingerlatseqatigiiffiit ingerlalluarnerpaat patajaannerpaallu ilaat.
- Nunatsinni nunanilu allani avannarlerni uatsitut sulialinnut imminnut assersuutissagutta ingerlalluartorujussuuvugut, soorunami tamanna iluarisimaarluinnarparput, Polar Seafodimi siulersuisunut siulittaasoq, Henrik Leth, naatsorsuutinut oqaaseqaatitut oqarpoq.
Aningaasaliissuterpassuit
Ukiumi naatsorsuusiorfiusumi kingullermi aningaasaliiffigineqartuni pingaarnerpaaq tassaasimavoq East Greenland Codfish A/S-imi, aalisakkanik immap qaavanut qanittumiittartunik, soorlu ammassannik, ammassassuarnik avaleraasartuunillu aalisartartumi, piginneqatigiissutit amerlanerussuteqarfigilerlugit pisiarinerat. Pisinerup tamatuma suliffeqarfiup immikkoortortallip aalisakkanik immap qaavanut qanittumiittunik aalisalernissaanut, Kalallit Nunaanni ineriartortinneqarluni aallartinneqalersumut, aallarnisaataaqataalluarnissaa Polar Seafoodimit naatsorsuutigneqarpoq.
Aningaasarpassuarnik aningaasaliineq alla tassaavoq Ruslandimi qerititsiviusussamik 4.500 m²-isut angissusilimmik illorsualiornissamut aningaasaliineq, Rusland niuerfittut siuariartorfigineqarmat. Nammineq tunisassiat saniatigut qerititsivissuaq taanna Moskvamut qanittumiittoq aqqutigalugu suliffeqarfiit arlalissuit allat sinnerlugit raajat isumagineqartarput. Taamaalilluni Polar Seafood Ruslandimi niuerfimmi aalisakkanik qalerualinnillu suliaqarfiit annerpaartaannut ilaalissaaq.
2013-imi angusat appasinnerujussuussasut
Suliariligassanut aningaasaliissutit amerlasuut atorneqartaraluartut 2013-imi taamatulli pitsaatigisunik angusaqartoqarnissaa Polar Seafoodip naatsorsuutiginngilaa. Paarlattuanik raajat pisassiissutaasartut niueqatigisartakkallu killup tungaanut ingerlanerat pissutigalugu, 2013-imi suliffeqarfissuarmut angusat ikinnerunerujussuunissaat ilimanarpoq. Immaqa 2012-mi angusat affaannaat.
Suliffeqarfissuaq Polar Seafood ullumikkut 900 millioner koruuningajannik nammineq aningaasaateqarpoq.