Skip to main content

Nuummi pisartut nuanniitsut

Politiit ukiumoortumik kisitsisitigut paasissutissanik saqqummersitaat atuarlugu nuannerpallaanngilaq. Imeriaatsivut pinerluttaalisitsisunit avoqqaarineqarput

Nuummi pinngitsaaliinerit pinngitsaaleriarnerillu 23-t siorna nalunaarutigineqarput.

Nakuusernermik suliat 243-t toqutsinerillu sualuttut marluk politeeqarfimmit ukiumoortumik kisitsisitigut paasissutissani tamanut saqqummiunneqaqqammersuni aamma nuanniillisaataaqataapput.

Nalunaarusialli qupperarneqarnerani ataaseq innuttaasunit politiinillu nuannaarutigineqarsinnaavoq. Paasiniaanerup paasisaqarnermik inerneqartarnera qaffasippoq!
Pinerluttuuneq 'inuussutissarsiornikkut' annertuumik aarlerinaateqarpoq. Suliassat nalunaarutigineqartut tamarmiusut 72 procentiini politiit pinerluuteqarsimasumik tigusarinnittarput.

Tamanna tamatigut eqqartuussuteqarnermik kinguneqartuaannartanngilaq, suliassat ilaat uppernarsaatissat pissutigalugit taamaatiinnarneqartariaqartarmata.
Taamaattorli tigusarineqarnissamut pineqaatissinneqarnissamullu aarlerinaat pissutigiinnarlugu inuit pinerluttunngornissamik taamaatitsiinnartanngillat.

Siorna pinerluttulerinermik inatsimmi unioqqutitsinerit nalunaarutigineqartut 2011-mi 4.844-niit  2012-imi 5.053-inut qaffariaateqarsimanerat politiit ukiumoortumik nalunaarusiaanni aamma takutinneqarpoq. Politiit naapertorlugit, tamanna »annilaajummernartuunngilaq«, taamaattorli anngiortumik eqquseriartartut tuniniaasartullu tigusariniartarneranni annertusisamik suliniuteqartoqaraluartoq assersuutigalugu ikiaroornartulerinermik suliat – annermik hashimut tunngasut – amerleriarsimanerat politimester Bjørn Tegner Bayip maluginiarpaa.

Ikiaroornartoq hash katillugit 50 kiilut missaanniittoq, aqqusinermi tuniniarneqaruni tuniniaasunit 30 aamma 35 millioner koruunit missaannik isertitsissutaasinnaasussaagaluaq politiinit nuna tamakkerlugu arsaarinnissutigineqarpoq. Aningaasat tamakkua annermik Danmarkimi tunuliaqutaasunut ingerlateqqinneqartarput.

- Aningaasat millionerpassuit qanoq amerlatigisut nunatsinnit taamaalillutik aniatinneqartarnerat pinerluttullu kaasarfiinut toqqaannartumik tutsinneqartarnerat eqqarsaatigalugu pakatsinartuuvoq. Tamatuma saniatigut inuit ataasiakkaat inuiaqatigiillu hashimit allatut ajoquserneqartarnerat soorunami aamma eqqarsaatigineqassapput, Bjørn Tegner Bay oqarpoq.

Nuummi susoqarnersoq Nuuk Ugeavisimi oqaluttuanik amerlanernik atuarsinnaavutit. Aviisi akeqanngitsumik uani pisiariguk:

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER