Internetterluta Tele sinneqartoortipparput
Tele Post 2012-mi 103,7 millioner koruunik sinneqartoorpoq 2011-mi 71,1 millioner koruuninik sinneqartooreerluni
Telep aningaasarsiornermigut siuariarneranut pissutaavoq internetimik atuinerup annertusiartupiloornera. Ukiup ataatsip ingerlanerani atuineq 66 procentimik qaffariarpoq. Sinneqartoorut amerleriarput allakkat poortukkallu nassiussat ikileriarsimagaluartut.
- Ingerlatseqatigiiffiup nioqqutaanik sullississutaanillu atuisut annertuumik ujartueruttulerfiisa nalaani TELE-POST-imut pisortaaninngorneq nuannerpoq, Michael Binzer TELE-POST-imi 1. april 2013 sulilersoq 2012-imullu ukiumoortumik nalunaarummik atsiugaqareersimasoq oqarpoq.
Suli internet
Nunatsinni internetimik atuineq qaffakkiartuinnarmat ukiuni aggersuni Tele pitsanngorsaaniarpoq.
- Sakkortussaavinni pingaarnermi internetip piginnaasaanik pingasoriaatinngortitsinissaq pilersaarutigineqarpoq, soorlumi aamma innutaasut 78 %-iisa missaannit 3G-p atorsinnaaffia 85 %-it missaannit atorneqarsinnaanngortinnissaa pilersaarutaasoq. Mobiltelefonip, mobilt internet ilanngullugu, nalinginnaasumik atorsinnaaffia nunaqarfinnut suli amerlanernut annertusaaviginiarneqarpoq, taamaalillutik innuttaasut 99 %-iinik amerlanerit atuisinnaanngortinneqassammata, Tele Post nalunaarpoq.