Skip to main content

WWF peqatigalugit issittumi ilisimasassarsiorlutit angalaqataagit

WWF Verdensnaturfondip kingumut kalaallit ilinniagallit periarfissippai issittumi ilisimasassarsiorluni immikkuullarilluinnartumik angalaaqataanissaannut 

Avatangiisit pillugit suliniaqatigiiffik WWF ukioq manna aammaarluni Kalaallit Nunaanni ilinniakkamik ingerlatsisut issittumi immikkuullarilluinnartumik ilisimasassarsioqataanissaannik periarfissiivoq. Ukioq manna ilisimasassarsiorluni angalanissami ’Students on Ice’, Nunatsinnit Nunavumillu ilinniartut pingasut peqataasinnaapput. 

Angalanermi ilinniartut 80-it tamaginnit aggerfillit peqataassapput, nunarsuarmi ilisimatusartut, oqaluttuarisaanermik sammisallit, eqqumiitsuliortut, misigisassarsiortut, ilinniartitsisut, nutaaliassanik nassaarsiortartut issittumilu ilisimasallit pingaaruteqarnerpaat 30-t ilagalugit angalassapput. Pisortat ingerlatsiviinnit aamma namminersorlutik inuussutissarsiortunit inuit 20-t pingaaruteqarnerpaat aamma peqataassapput.

Ilisimasassarsiorluni angalanermi umiarsuaq  M/V Sea Adventurer, Kangerlussuaq tikillugu angalariarluni kitaata sineriaagut tukimut Baffinip Kangerliumanersuanit Qausuittuq (Resolute), Nunavumi Paggivittamut tassanngaanniillu timmisartumik Iqalunnut naggataatigullu Ottawamut.  

Ilisimasassarsiornerup nalaani ilinniartut periarfissinneqassapput uumasunik inunnillu qanillinissaminnut, issittumi qanga pissutsit, maannakkut siunissamilu pisussat ilisimasaqarfiginerulissavaat. Angalaneq tamaat ilinniartitsisoqassaaq inuiaqatigiit, uumasut aamma silap pissusaata allanngoriartorneranut tunngassuteqarnerit. 



Misisigisaqarumagaanni
- Kalaallinut ilinniagaqartunut taamannak periarfissiisinnaanerput nuannaarutigaarput. Kalaallit Nunaanni suliatsinnut allanut tunngatillugu naapertuulluarpoq. Ilinniartut angalaqataanermikkut Kalaallit Nunaat sinnerlugu aallartitatut atuutissapput, ilikkagaqarujussuarlutik tamatumalu saniatigut misigisaqarujussuarlutik, Gitte Seeberg, WWF Verdensnaturfondenimi generalsekretæri oqarpoq. 

Siorna issittormiut ilisimasassarsiorneranni Students on Ice peqataavoq Ivalu Berlach Christensen, Sisimiut. Taanna angalanermik nuannerluinnartumik misigisaqarpoq.

- Angalaneq sutigut tamatigut nuannerluinnarpoq. Nunat assigiinngitsut pillugit ilikkagaqangaanga takusaqaqalungalu. Aamma uanga nammineq nunagigaluarlugu, alliartorfiga - allarluinnarnik iseqarlunga takuara - nunamut isiginnittaatsinnik allanngortitsilluinnartumik. Nunanit assigiinngitsorpassuarnit peqataasoqarnera nuannareqaara, Ivalu oqarpoq nangillunilu:

- Innersuussutigerusuppara amerlasoorpassuit angalaqataassasut ilinniarfioqimmat. Immaqa atuarfimmi pikkorinnerpaajunngikkaluarluni angalaneq kikkunnut tamanut naleqquppoq. Inuunermi misigisaq puigugassaanngitsoq,  Ivalu Berlach Christensen oqarpoq.

Atuaruk: Student on Ice

Kalaallit Nunaannit Nunavummiillu inissat pingasut arlaat pissarsiariniaraanni ilisimasassarsiornerup nalaani 16- 18-inik ukioqarnissaq piumasaqaataavoq, ilinniakkamik ingerlatsilluni, nunatsinni najugaqarluni aamma tuluttut oqalussinnaallunilu paasisinnaaneq, angalanermi oqaatsit taakkua atorneqarmata. 

Kalaallit inuussuttut Danmarkimi ilinniagaqartut qinnuteqaataat aamma ilassilluarneqassapput. Angalanermi angaasartuutit suulluunniit akilerneqassapput ilinniartulli namminneq kaasarfimmiussatik isumagissavaat, angajoqqaamminniillu akuersissuteqarlutik angalaqataassallutik. 


Allanik atuarit aamma qinnuteqaat uani aasinnaavat. Qinnuteqaat nassiunneqariissaaq apriilip 15-iat.  

Students on Ice pillugu:
Ukioq manna ilisimasassarsiorluni angalaneq "Students on Ice Arctic Expedition", angalanerit 13-issaraat.
Ilisimasassarsiorluni angalaneq pissaaq 14.-28. juuli, 2013.
Ilisimasassarsiorluni angallat; M/V Sea Adventurer.
Students on Ice, ilinniarnermik ingerlatsiviuvoq nersornaasigaq, issittumi sumiiffik aallaavigalugu atuunnermini ilinniartut 2000-t nunanit 52-init Issittumi Sikuijuitsumilu ilisimasassarsiornissaannik periarfissiisimasoq.  

Qinnuteqaat nittartakkap naqqani aasinnaavat


 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER