Disneyp Kangilinnguit pisiarissavaa
Nunatta kujataani sakkutooqarfiusimasumi illuutit issittumi nuannaariartarfinngussapput
Apriilip aallaqqaataani USA-mi Disneyp Kangilinnguani sakkutooqarfiusimasoq pisiarissavaat. Tamanna pivoq siorna sakkutooqarfeqarnikkut nutaamik aaqqissuussisoqareersorlu Issittumilu Sakkutooqarfik Nuummut nuulluni.
Kujataani illuutit tuniniarneqarput. Pisinissamullu piffissaq naanngitsiartoq ullumikkut nunarsuarmi tamarmik nuannaariartarfeqarnikkut siuttuusoq illuutinik qimatanik soqutiginnippoq.
– Ukiuni makkunani Issittoq sammineqarluarpoq, meeqqani inersimasunilu, nunarsuullu immikkoortuani tassani periarfissat atorluarniarparput ilaqutariinnullu tamanut pitsaasumik aliikkusiarfissamik pilersitsiniarluta, Disney tusagassiuutinut nalunaarpoq.
Nunanit allaniit takuniaasorpassuit ilaatigut umiarsuakkut Kangilinnguanut tikittassapput ilaatigullu timmisartukkut Narsarsuup Mittarfiatigut. Aliikkusiartarfissallu Narsarsuup nunarsuup sinneranut mittarfiuinnarnissaanik imaluunniit Qaqortumi nunap immikkoortuani mittarfeqarnissaanik oqallinneq allarluinnarmut sangutippaa.
Issittumi aliikkusiartarfissaq Disneyp silarsuaani nutaarluinnarmik pilersitsisoqassaaq, tassaassaarlu THe Polar Bears, nannut najugaqarfiat Andebytut ittoq. Nannut silarsiaani immikkoortut siulliit Anders And & Co-mi aasaq manna naqinneqariissapput, soorlu aamma tassaniittut Mc Donaldsip tunisassiaatigut tuniniarneqassallutik. Minnerunngitsumillu titartakkanik filimiliaq juullimi filmeriartarfinniissaaq tassalu nuannaariartarfiup ammarnissaanut.
Partiilli INuit isornartorsiulereerpaat Kangilinnguit nunat allamiunit tiguneqassammat. Partiillu piumasaraa inuttaasut takuniaasullu tamarmik kalaallisut oqalussinnaassasut pilersaarutit nunatsinni naalakkersuinikkut akimmisaartinneqassanngippata.