Nikku: Taamaattumik peqataanngilanga

Partii Inuit ineqarnermut avatangiisinullu naalakkersuisoqarfik oqartussaaffigilissavaat

- Isummersorfigisimavarput uanga imaluunnit Randi Broberg naalakkersuisuni ilaasortanngussanersoq. Partiitulli nutaarluinnaavugut suli siammarterlutalu inissisimaffitsinnik nukittorsaanissamik pisariaqartitsilluta, Nikku Olsen oqarpoq. Assi.: Leiff Josefsen

Partii Inuit siulittaasuat kalaallisut oqaatsivut pillugit qineqqusaarnermi saqqummeqattaarpoq. Aamma kulturimik suliallit iligimassuk arlalinnit ilimagineqalersimagaluarpoq kulturimut naalakkersuisuni ilaasortanngussasoq. Namminerli Inatsisartuni ilaasortaannartut ingerlaniarpoq.

Partii Inuit Naalakkersuisuni ilaasortaatitarilerpaat Mette Lynge ineqarnermut avatangiisinullu oqartussaalertussanngortoq. Partiit Inuit sinnerlugit qinigaasut Nikku Olsen aamma Randi Broberg naalakkersuisunngussanngillat.

- Partiitta iluani nukiit siammanerullugit atorluarnissaat uani pineqarpoq, Partii Inuit siulittaasua Nikku Olsen Sermitsiaq.AG-mut oqarpoq.

Partii nukittorsarlugu
Nikku Olsen Partii Inuit taaguunneqarnersaraat 1.116-nit taaguunneqarmat Mette Lynge sinniisussamut tullinngortoq 75-nit taaneqarluni.

- Isummersorfigisimavarput uanga imaluunnit Randi Broberg naalakkersuisuni ilaasortanngussanersoq. Partiitulli nutaarluinnaavugut suli siammarterlutalu inissisimaffitsinnik nukittorsaanissamik pisariaqartitsilluta, Nikku Olsen oqarpoq.

- Mette Lynge toqqarparput pinngortitamut ilisimasarpassuaqarmat. Aamma ineqarnermut politikki pitsaasup ingerlannissaanut periarfissaqalissaagut, Nikku Olsen oqarpoq.

Powered by Labrador CMS