(Allaaserisaq nutarterneqartuarpoq  - kingullermik nal. 11.41)

Inatsisartunut qinersisoqarneraniit ullut 14-it qaangiuttullu naalakkersuisooqatiginngortuni partiit siulittaasuinit pingasunit naalakkersuisooqatigiinnissamik isumaqatigiissut tusagassiortunik katersortitsinermi Nuummi Katuami inersuaaqqami nal. 11.00 aallartittumi atsiorneqarlunilu ilisaritinneqarpoq.

Nal. 11.30 missiliuleraa Naalakkersuisunut ilaasortanngortut nutaat aqqi saqqummiunneqarput.

Ilimagineqareersutullu Siumup siulittaasua Aleqa Hammond Naalakkersuisunut siulittaasunngorpoq. Tamatuma saniatigut nunanut allanut tunngasuni akisussaasunngorpoq.

Naalakkersuisunut ilaasortanngortut sinneri ukuupput:

• Aningaasaqarnermut nunamilu nammineq pissutsinut naalakkersuisoq Vittus Qujaukitsoq, Siumut
• Aalisarnermut, piniarnermut nunalerinermullu naalakkersuisoq Karl Lyberth, Siumut
• Inuussutissarsiornermut aatsitassanullu naalakkersuisoq Jens Erik Kirkegaard, Siumut
• Ilaqutariinnermut inatsisinillu atortitsinermut naalakkersuisoq Martha Lund Olsen, Siumut
• Ilinniartitaanermut, piorsarsimassutsimut naligiissitaanermullu naalakkersuisoq Nick Nielsen, Siumut
• Peqqissutsimut attaveqarnermullu naalakkersuisoq Sten Lynge, Atassut
• Ineqarnermut, pinngortitamut avatangiisinullu naalakkersuisoq Mette Lynge, Partii Inuit

Partii Inuit siulittaasuata Nikku Olsenip aamma Atassutip siulittaasuata Gerhardt Petersenip naalakkersuisunut ilaasortanngortinneqannginnerat maluginiagassaavoq.

Læs "I dag får vi et nyt Naalakkersuisut"

Læs "Inatsisartut mødes 5. april"

Apriilip tallimaani ivertinneqassasut
Siumut, Partii Inuit aamma Atassut Inatsisartuni ataatsimut katillugit 18-inik ilaasortaatitaqarput, illuatungiliuttullu Inuit Ataqatigiit aamma Demokraatit 13-inik ilaasortaatitaqarlutik.

Marsip aqqaneq-aappaani Inatsisartunut qinersisoqarneraniit sapaatip-akunneri marluk ingerlareersullu nunarput nutaanik naalakkersuisortaarpoq.

Juunip aappaani 2009-mi Inatsisartunut qinersinerup kingorna naalakkersuisunngortut Inuit Ataqatigiit, Demokraatit aamma Kattusseqatigiit Partiiat naalakkersuisooqatigiinnissamut isumaqatigiissummik juunip qulingani - qinersisoqarneraniit ullut arfineq-pingasut qaangiunneranni - saqqummiussipput.

Naalakkersuisunngortut pilersaarutit malillugit sapaatip-akunnerani kingullermi tallimanngornermi tamanut saqqummiunneqartussaagaluarput, partiilli siulittaasui pingasuusut pissutaa suli ilisimaneqanngitsumik ullunik sisamanik immikkut atuisariaqarsimallutik.

Aleqa Hammondip partiit pingasut naalakkersuisooqatigiinnissaat marsip 19-iani saqqummiuppaa.

Naalakkersuisunngortut pisortatigoortumik ivertinneqassapput Inatsisartut tallimanngornermi apriilip tallimaani inissitsiterfiusumik ataatsimiilerpata.