Inatsisartut apriilip tallimaani katersuutissapput
Inatsisartut utoqqaanersaat Lars Emil Johansen Inatsisartut nutaat inissitsiternissaannut tallimanngorneq apriilip tallimaat ataatsimiigiaqqusivoq
Naalakkersuisunngortitsiniarneq ima naammasseqqajaatigaaq inatsisartunut qinigaarlaat inissitsiterluni katersuunnissamut apriilip tallimaani ataatsimiigiaqquneqarlutik. Qinigaasinnaanerup misilinneqarnissaanut ataatsimiititaliaagallartup kikkut qinikkatut sulisinnaanerat pillugu nalilersuinini naammassivaa, qinigaasulli tamarmik qinikkatut sulisinnaanersut ataatsimiinneq ammarpat aatsaat nalunaarutigineqarumaarpoq.
- Inatsisartunngorlaanut ataatsimiigiaqqusissutiga aatsaarluinnaq nassiuppoq tassalu apriilip tallimaani inissitsiterluta ataatsimiissaagut, Siumut sinnerlugu qinigaasoq aamma Inatsisartunngortussani angajullersaasoq Lars Emil Johansen Sermitsiaq.AG-mut oqarpoq.
Tamarmik qinigaasinnaappat?
Taamaattoq maanna oqaatiginianngikkallarpaa qinikkat tamarmik qinikkatut sulisinnaasutut akuerineqarsimanersut.
- Qinigaasinnaatitaanermut ataatsimiititaliaagallartup nassuiaataa ataatsimiinneq ammarpat aatsaat saqqummiuneqartussaavoq. Taamaammat taanna pillugu maanna saqqummiussaqarsinnaanngilanga, Lars Emil Johansen oqarpoq.
Inatsisartuni ataatsimiititaliani ataavartuni ilaasortat aamma siunnersuisooqatigiinni assigisaannilu ilaasortat toqqarneqassapput tamannalu ataasinngorneq apriilip arfineq pingajuat pissaaq sapaatip akunnerata naanerani qinikkatut sulineq pillugu pikkorissaasoqareerpat.