Namminersorlutik Oqartussat avannaani sanaartorpianngillat
Sanaartornermi suliffissaqartitsiniarneq najukkamilu sanasut naalagaat tamatumani sakkortuumik eqqugaapput, GA-p Ilulissani immikkoortortaqarfianut siulittaasoq Jens Peter Pars oqarpoq
Najukkami namminersortunut iluaqutaasumik kommunimi sanaartornerup annikilleriarujussuarnera kommunini namminersortut misigisimavaat.
– Ukiuni arlalinni inissialiortitertoqarsimanngilaq. Taamaattorli Ilaatigut Ilulissani GA-p tatisineratigut 2012-imi Ilulissani inissianik 24-nik sanaartorneq aallartippoq. Piginneqatigiilluni inissianik sanaartorneq unittoorluinnarsimavoq. Inissiat 20-20-60-it nalinginnaasut 2012-imi sanaartorneqanngilluinnarput, siulittaasoq ilisimatitsivoq.
– Najukkami sanasut naalagaasa peqataatinneqartannginnerat misilittagarineqarpoq, assersuutigalugu Namminersorlutik Oqartussat Nukissiorfiilluunniit Ilulissani erngup nukinganik nukissiorfimmik 650 millioner koruunit missaannik nalilimmik suliariumannittussarsiuummata. Najukkami sanasut naalagaat peqataasimasinnaagaluarput assersuutigalugulu maani illoqarfimmi innaallagissamik agguataarisarfiup illutaata sananeqarnera isumagisimasinnaagaluarlugu, Jens Peter Pars oqarpoq.
– Ilulissani suliffeqarfissuarnut avataaneersunut najukkami mesterinik sulisuinillu ilinniartuutaannillu ilisimasaannut akuutitsinngingajattunut atuinngingajattunullu 650 millioner koruunit nalinginut sanaartortoqarnera Namminersorlutik Oqartussanut ajunngitsumik isikkoqarpoq. 650 millioner koruunit taakkua 10 procentiinnaalluunniit najukkami mesterinut sanaartornermi ingerlataqartitsisimassagaluarput 65 millioner koruunit. 65 millionit taakkua Ilulissani aningaasaqarnermut iluaqutaasimassagaluarput aningaasallu inuiaqatigiinni kaaviiaarsimassagaluarlutik. Kisianni naamik, suliffeqarfissuit avataaneersut sunik tamanik tigooraanerannut isiginnaartuinnaavugut, ineriartortitsinermullu isiginnaartuinnaalluta. G-60-ip politikkianut utersaarsimavugut, Jens Peter Pars oqarpoq.
Qaasuitsup kommuniani susoqarnersoq sapaatip akunneranut saqqummertartumi Tamanut Avannaanimi oqaluttuap sinnera atuaruk. Aviisi akeqanngitsumik uani pisiariguk: