WWF naalakkersuisunngortitsussanut: Pisussaaffiliivoq

Verdensnaturfondenimit kajumissaarutigineqarpoq naalakkersuisunngortussat Kalaallit Nunaanni piujuartitsinermik ilariartortitsinissaat

- Pingaarluinnartuuvoq naalakkersuisunngortussat piujuartitsinermik tunaartaqarlutik Kalaallit Nunaannik ineriartortitsinissaat, WWF-imi allattaaneq Gitte Seeberg oqarpoq. Assi: WWF Verdensnaturfonden

Kalaallit Nunaanni naalakkersuisunngortussatut nalunaarutigineqaqqammersut piujuartitsinermik tunaartaqarnissaat pingaartuuvoq.

Taama allappoq WWF Verdensnaturfondenimi allattaaneq Gitte Seeberg.

- Siullermik partiit naalakkersuisunngortitsisut tamaasa pilluaqqujumavakka. Nalorninaatsumik amerlanerussuteqarput pisussaaffiliisumik. Maannakkut ataatsimoorlutik politikkissaminnik aalajangersaasussanngorput Kalaallit Nunaanni ineriartornerup pisariaqaqisup piujuartitsinermik ingerlanneqarnissaanik qulakkeerisumik, Gitte Seeberg oqarpoq.

- Pingaarluinnartuuvoq aatsitassarsiornikkut suliffissuaqarnerup takkuttussap ataavartumillu uuliamik ujaasinerup pinngortitamik kalaallit ullumikkut inussutaannik naviartorsiortitsinnginnissaat. Aalisarneq suli isertitaqarfiuvoq pingaarluinnartoq upperaaralu kalaallit tamatuma innarlernissaa kissaatiginngikkaat, Gitte Seeberg oqarpoq.

WWF Verdensnaturfonden Kalaallit Nunaanni suliniutinik arlalinnik ingerlataqarpoq ilaatigut ICC suleqatigalugu. Tassani Kalaallit Nunaata siunissaa pillugu aalajangiinerni innuttaasut akuutinneqarnissaat tunaartarineqarpoq.

Akisussaaffik annertooq
- Siumut, Partii Inuit Atassullu Kalaallit Nunaata siunissami ataatsimoortumik aqunneqarnissaanik annertuumik suliassaqarput. Tassani innuttaasut akuutinneqarnerunissaat pisariaqarpoq, neriuutigaarali aamma naalakkersuisunngortussat partiit naalakkersuisuutitaqarsimasut isumaqatigiissuteqarfigisarlugit sulissasut, Gitte Seeberg tusagassiuutinut nalunaarpoq.

- Kalaallit Nunaata kitaani kinguppanniarneq MSC-mik uppernarsaaserneqaqqammerpoq. Taamaattumik kissaatigaara siunissami pinngortitami pisuussutit isumannaatsumik aqunneqartuassasut, Gitte Seeberg allappoq.

Siumut, Partii Inuit Atassullu tallimanngorpat naalakkersuisuutitaqarnissaminnik atsiussangatinneqarput, naalakkersuisunngortussallu inuttalerneqarlutik.

Powered by Labrador CMS