Angutimmarik uteqqilersoq
Nunarput sinnerlugu assammik arsartartoq Angutimmarik Kreutzmann qaammatini tallimangajanni annernermi kingorna uninnganikuulluni kingumut arsaateqqilissaaq
Angutimmarik Kreutzmann, tyskit 2. Bundesliga-klubiani Eintracht Hildesheimimi arsaattartoq, novembarip aappaani isikkami aappaani saaneq napivaa pilatsittariaqarlunilu.
- Qangali annersinnikuusara ima akornutigitigaara pilatsinnissara pisariaqalerluni, Angutimmarik Sermitsiaq.AG-mut oqarpoq nangilluni:
- Pilatsinnera misillernaqaaq. Qujanartumik ajunngitsumik ingerlavoq anniarunnaarpunga arsaqqinnissannullu qilanaarlunga. Taamaattumimmiuna Tysklandimiittunga. Maannakkut nuannaarutigaara aatsaat taamak timikkut atugarissaartiginera.
- Soorunami sapaatip-akunneri arlallit qaangiuppata aatsaat piginnaanera naapertorlugu ingerlatseqqilersinnaavunga taamaattumik unamminerni siullerni holditta aappaanni peqataanissara naatsorsuutigalugu.
Unammiuaarfik pakatsinartoq
Eintracht Hildesheimimut unammiuaarneq aallartimmat Bundesligamit pitsaannginnerit akornannut pisimasumut ukioq unammiuaarfik pakatsinarsimaqaaq.
Ungasinngitsumi sungiusaasoq soraarsinneqarpoq. Klubbi ukiup unammiuaarfiup aallartinnginnerani kingumut pimanernut uternissamik neriussimagaluartut maannakkut pakatsinartumik nummer 15-itut inissisimavoq, tassanngaannarlu suli ajornikuunernut appariannginnissaq ilungersuutigilersinnaallugu. 2. bundesligami klubbit 20-t peqataapput sulilu unamminerit aqqaneq-marluk ingerlanneqartussaallutik, taamaattumik juunimi unammiuaarfik naammassitinnagu assigiinngitsunik pisoqarsinnaavoq.
Naak, Eintracht Hildesheim assigiinngisitaartunik angusaqartarnini ilungersuutigaa, taamaattumik timersoqatigiiffimmik illersuisartut illoqarfimmi unamminernut illersuiartorlutik aggialluartarlutik. Akuttunngitsumik isiginnaariat 1800 missaanniittarput timersortarfissuarmi Sparkassen Arenami, tassani isiginnaartut katillugit 2800-ssinnaapput.