Angerlarsimaffeqanngitsut oqallisaarusupput
Angerlarsimaffeqanngitsut ornittagaat Café Kialaarfik Nuummi Ceresvejimiittoq atuisorpassuaqarpoq. Ajornartorsiutitilli oqallisaanngippallaartut angerlarsimaffeqanngitsut isumaqarput
Angerlarsimaffeqanngitsut taakkulu atugaannik naammaginnikkunnaartut Nuummi ullumi isummaminnik nittarsaassipput. Taamatut isummanik nittarsaassinnermi anguniarneqarpoq kommunimut qineqqusaarnermi angerlarsimaffeqanngitsut atugaasa oqallisigineqarnerunissaat.
Cafe Kialaarfik maanna atuisorpassuaqarpoq taakkulu imaannaanngitsunik ajornartorsiuteqartarput. Taamaattoq ajornartorsiutit tamakku eqqumaffigineqanngippallaartut angerlarsimaffeqanngitsut sullissisuilu isumaqarput.
- Kissaatigigaluaqaarput inunnik isumaginninnermi siunnersortimik Cafe Kialaarfimmi peqalernissaa. Pissutsit maannakkutut ingerlaannarsinnaanngillat, Cafe Kialaarfimmi ulluinnarni aqutsisoq Rosannguaq Berthelsen Sermitsiaq.AG-mut oqarpoq.
Ajortumik pisoqariaannaavoq
Café Kialaarfik ulloq unnuarlu ammasarpoq atuisullu ilaatigut takkuttarput ajornartorsiutitik pillugit oqaloqatissaaleqillutik.
- Ilaat annertuunik ajornartorsiuteqartarput qanoq iliuuseqarfigisinnaanngisannik. Kisianni isumaginninnermi siunnersortimik oqaloqateqarnissamut utaqqisorpassuaqartarpoq oqaloqateqarnissamut ilaatigut qaammat ataaseq angullugu utaqqisoqarsinnaasarluni, Rosannguaq Berthelsen oqarpoq.
- Inuit taama ajornartorsiuteqartigisut, ilaatigut atornerluinermi ajornartorsiuteqartut, taama sivisutigisumik utaqqisariaqartarneranni arlaannik ajortumik pisoqariaannaavoq. Taamaammat pitsaassagaluaqaaq inunnik isumaginninnermi siunnersortimik suleqateqartuugutta, Rosannguaq Berthelsen oqarpoq.
Isummaminnik nittarsaassisut Ceresvejimi Blok E-miit kommunep ataatsimiittarfiata silataanut ingerlaaqatigiipput.