Skip to main content

Avannaata Qimussersua issangiarsiorpoq

Ukiormanna Avannaata Qimussersuani ataatsikkut aallartoqassanngilaq. Aallarfissaanni aputip aassimanera pissutaavoq

Pinngortitarsuup kialaarsinnaassutsini Ilulissani misigitippaa sapaatip akunneratalu naanerani issangissermat qulit angullugit kiappoq. Tamatuma Avannaata Qimussersua ukiormanna ukiunik 25-nngortorsiortoq eqqortussanngorpaa. Ukiormanna sukkaniunneq ataatsikkut aallarnertaqanngitsumik pisussanngorpoq.

Aallarfissaanni Narsarsuarmi Ilulissat illoqarfiata silatinnguaniittumi aput aappoq. Tassanilu tassa qimussersuit aallartussaagaluarput sukkaniunneq arfininngorneq martsip 23-at pilerpat. Aaqqissuisut pissutsit taamaasinerat nalilersoreerlugu aalajangiuppaat ukiormanna ataatsikkut aallartoqarsinnaanngitsoq.

Nuna allarluinnaq
- Ataatsikkut aallarnissamut Narsarsuaq aputikipallaarpoq. Taamaammat peqataasussat paaseqatigalugit marlukkaarlutik aallartarnissaat aalajangiupparput. Minutsinik tallimanik akunneqartarlutik aallagartinnissaat aamma aalajangiupparput, aaqqissuisuni Qimussersami siulittaasoq Ville Siegstad Sermitsiaq.AG-mut taama oqarpoq.

Arlallit aarleqqutigileraluarsimavaat aputikippallaarnera pissutigalugu Avannaata Qimussersuata taamaatiinnaratarsinnaanera. Kisianni peqataasut Akinnakkut majuartussaapput qaqigunillu immamiit 400 meteri sinnerlugu qatsinnerusoq ingerlavigisussaallugu.

- Tappanna aputigissorsuuvoq aammalu peqataasussat tappanna qimusserfigereerpaat. Narsarsuaq kisimi aputaasattussanngorpoq. Aamma kommunip sisorarfimmi qamussui atorlugit apummik nussuiniarpugut Akinnarmi aqqut sapinngisamik isumannaatsuutinniarlugu, Ville Siegstad oqarpoq.

Minutsilersorlugu unammineq
Isigisaq takorannersorsuusaraluarpoq Nunatsinni qimussillaqqinerpaat 28-it ataatsikkut aallaraangata aallaqqaarnerlu sukkaniunnerup sinneranut pingaarutilerujussuusarpoq aallarluartut angusarissaarajuttarmata. Maannalu tassa marlukkaarlutik aallartussanngorput.

- Peqataasussat marlunngornermi unnukkut kulturip illorsuani Sermermiuni ilisaritinneqassapput. Periarfissaq taanna iluatsillugu aallarnissami tulleriiaarnissaannut makitsisoqassaaq, Ville Siegstad nassuiaavoq.

Tassalu kina Avannaata Qimussersuanngornersoq aatsaat paasinarsiumaarpoq peqataasut tamarmik apuuteerpata piffissarlu atugaat naatsorsorneqareerpat.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER