Aleqa: Taamaattumik Siumut ajugaavoq
Siumut qinersinermi ajugaasungavoq maanna marlunngornerup naammassisimalernerani. Aleqa Hammondip partiip annersanngoqqinneranut tamanna pingasunik tunngaveqarnerarpaa
- Aqutseriaat naammagittaalliutigineqarpoq maannamut ingerlanneqartoq. Aatsitassanut suliniutinut matoqqasorujussuarmik pissuseqartoqarpoq aamma aalisarnermi ajornartorsiutit, kiisalu Nuup avataani sanaartortoqannginnera qinersinerup inerneranut aalajangiisuupput.
Siumup siulittaasua Aleqa Hammondip qinersinermit inerniugallartoq Sermitsiaq.AG-mut nalilersorpaa, qinersiviup qaangiuttup unnuaani nal. 01.00 missaanni.
Siumut siulittaasua Aleqa Hammond, taamannak partiip siumukarnera Sermitsiaq.AG-mut nalilersorpaa.
Siumut siuariarujussuarpoq naalakkersuisuutitaqartut, Inuit Ataqatigiit, Demokraatit aamma Kattusseqatigiit Partiiat qinersisartunit pillarneqarlutik.
- Innuttaasut ataatsimoorfissaq maqaasisimavaat aamma Naalakkersuisut siulittaasuat innuttaasut akornanni saqqumilaanngippallaarsimavoq, naak innuttaasunut pingaaruteqartorujussuusoq inuppalaartumik aqutsiseqarnissaq, pingaartumik namminiilernissamut aqqummi, Aleqa Hammond oqarpoq.
Kuupik akisussaanerarpoq
Inuit Ataqatigiit, ukiuni kingullerni sisamani Naalakkersuisuni politikkimik ingerlatsinermi siuttuusimavoq. Kisianni Inuit Ataqatigiit siulittaasuata Kuupik Kleistip uggorinngilaa Naalakkersuisuni taamannak nunamik aqutsisimagamik.
- Qinersinerup inernera uanga akisussaaffigaara. Qinersinermi ajorsarnermut aalajangiinerit aalajangertariaqarsimatsinnit pissuteqarput. Aalisarnermi ajornakusoortunik aalajangiisariaqarsimavugut, ineqarnermut akiliummik qaffaalluta iluarsartuussinernut pisariaqartunut akissaqarniassagatta taamatullu suliffissaaleqinerujussuaq aamma sunniuteqarsimavoq, Kuupik Kleist Sermitsiaq.AG.-mut oqarpoq.
- Aamma qineqqusaarnerup nalaani paasissutissanik tunngavissalinnik saqqummiussinissatsinnut pikkorinnerusimanngilagut, Kuupik Kleist oqarpoq.
Siumut siulittaasoqarfia pingasunngornermi nal. 13.00 naapissapput aamma Aleqa Hammondip naalakkersuisunngortitsiniarluni isumaqatigiinniarnissamut pilersaarusiani tusagassiivinnut nal. 15.00 nalunaarutigissavaa.