Danmarkimi tusagassiuutit nunatsinni qinersinermit uumisaarneqartut

Ullumikkut Inatsisartunut qinersineq Danmarkimi tusagassiuutinit malittarineqarluarpoq, taakkuami ilaat arlallit Nuummut aallartitaqarsimapput ilanngutassioriartortunik. TV2 aamma DR piorsarsimassutsikkut illorsuarmi Katuami aalajangersimasumik inissisimaffeqarput, tassanngaanniillu ullup ingerlanerani nalunaaruteqartarlutik.

Qinersinerup eqqumaffigineqartorujussuuneranut pissutaasut ilaat tassaavoq, nunatta ukiuni makkunani aatsitassarsiornermut atatillugu nunattalu namminiilivinnissaanik oqallinnermut atatillugu annertuumik aalajangigassaqarnera.

Qinersinerli pillugu nutaarsiassaqartitsinermi ullup ingerlanerani marlussunnik annertujaanik kukkusoqartarpoq. Politiken ullaap'tungaani ima allalluni aallarniivoq:

- Maanngaanniit sumiiffinni allani taasisoqarsinnaanngilaq, taamaattumik illoqarfimmi aqutsisut aalajangersimapput nunap illoqarfinnik angisuunik arlaqanngitsunik kiisalu nunaqarfinnik mikineerarpassuarnik ilaqartup ilaani ungasissumiit aggersut bussimik akeqanngitsumik ingerlattarniarlugit.

Kukkunerli tamanna aaqqinneqalertorpoq, taamalu ilanngutassiortup ilisimasakinnera sivisunerusumik saqqummiunneqarani. Tamannali Danmarkimi innuttaasut akornanni ilisimasakinnermut takussutissaalluarpoq.

Erfalasutsinnut taarsiullugu Japanimiut erfalasuat
Tamatuma kinguninngua tv-eeqarfik TV2 News ullumi nal. 12.36 nunatsinni qinersineq pillugu nutaarsiassatut ilanngutassiaminni kalaallit erfalasuannut taarsiullugu Japanimiut erfalasuannik takutitaqarput.

TV2 piffissap sivikitsup ingerlanerinnaani nutaarsiassaqartitsinerminni aappassaa kukkusumik assiliartaliipput. Februaarip 26-ani TV2 Nyhederne Syriami illoqarfiit pingaarnersaat Damaskus pillugu ilanngutassiamini qarasaasiakkut pinnguaammit Assassin's Creedimi assiliartamik atuipput.

Mikkel Hertz, TV2 Newsimi pisortaq, kukkunermut atatillugu inuiannut kalaallinut utoqqatserujussuarpoq, erseqqissaatigalugulu kukkunermi ajortumik siunertaqartoqanngitsoq, Politiken nittartakkamini allappoq.