Qinersisitsisoq: Taamaattumik taasiartortut procentiat qaffasinneruvoq
Katuap Nuuk qiterani inissisimanera pissutaalluni Nuummi inuit qinersiartornissaminnik kajuminnerupput, illoqarfimmi qinersinermik aqutsisoq naliliivoq
Ullup-qeqqata siorna Nuummi qinersisinnaasut 17,1 procentii taasiartorsimapput, 2009-mi Inatsisartunut qinersinermi piffissami assingusumi taamaallaat 15.0 procent taasiartorsimasut.
Karno Lynge Nuummi qinersisitsinermik pisortaasoq oqarpoq, qinersiartortut amerlanerunerannut Katuap illoqarfiup qeqqani inissisimanera pissutaasoq, siornatigut taasiartorfigineqartartunut Katersortarfimmut Inussuvimmullu naleqqiullugit taanna qiterpasinnermiimmat.
- Katuaq illoqarfiup qeqqaniippoq taassumalu eqqaani suliffeqarfippassuit inissisimallutik inuit orniguffigisaat, Karno Lynge Sermitsiaq.AG-mut oqaluttuarpoq.
Kommuneqarfik Sermersuumit sulisut 40-t qinersinerup ajornartorsiutitaqanngitsumik ingerlanneqarsinnaanera isumagaat.
- Atortut tungaatigut ajornartorsiuteqalaarpugut erngerluta aaqqissinnaasatsinnik. Manna tikillugu ingerlatsinerput naammagisimaarluarpara, Karno Lynge, nalunaaqquttap 9.00 aamma 10.00 akornanni inuppassuit qinersiartornerannik naammattuugaqartoq oqaluttuarpoq.
Nuummi qinersisinnaasut 12.016-iupput, Qeqertarsuatsiaani qinersisinnaasut 165 kiisalu Kapisilinniillutik 66-it.