Tele-post: Ilumuunngilaq, Miiti Lynge...

Tele-Postimi sulisoqarnermut pisortap ilumuunnginnerarpaa suliffeqarfiup sulisussarsiornermini kalaallinik sulisoqalertannginneranik Miiti Lyngep qineqqusaarnerup nalaani oqaatigisaa

Assi: Leiff Josefsen

Tele-Post tunngaviusumik qineqqusaarnermut ingerlasumut akulerukkusunngilaq. Kisiannili oqaatsit ingerlatseqatigiiffimmut akornutaasinnaasut aaqqiiffiginissaat uatsinnut pingaaruteqarpoq.

Tusagassiivinnut allakkatigut Tele-Postimi sulisoqarnermut pisortap, Karl-Henrik Simonsen, qineqqusaarnerup ingerlanerani oqaatigineqartoq ilumuunngiinnerarpaa, ingerlatseqatigiiffiup sulisussarsiornermini qinnuteqartut ilaat itigartissimagaa kalaaliunera pissutigalugu.

Sapaammi 3. marts 2013-imi Partii Inuit KNR-ikkut apeqqarissaarfigineqarmat taamatut oqaaseqartoqarpoq. Tassani partiip Inatsisartunut qinigassanngortitaa Miiti Lynge oqarpoq, ingerlatseqatigiiffiit Namminersorlutik Oqartussanit pigineqartut atorfinitsitsinissamut qinnuteqartut kalaaliunerat pissutigalugu itigartittaraat. Tassani aamma qinigassanngortittup Tele-Post assersuutitut immikkut taavaa..

- Suliassami tassani atorfinitsitsisarnerup najugaqavissut pitsaasumik pineqarnissaannut tapertaanissaanik qulakkeeriffiusumik Tele-Post ersarilluinnartumik politikeqarpoq tulleriiaarisarlunilu. Tassalu atorfinitsitsisarnermut politikini maleruagassanilu najugaqavissut salliutinneqarnissaat anguniarneqartarpoq, taamaalilluni sulisup sulitiinnarsinnaanissaata qularnaateqannginnera annertusisussaammat. Taamaattumik aamma suliffeqarfimmi ilinniartut 40-45 ingerlaavartumik atorfinitsinneqartarput, Karl-Henrik Simonsen erseqqissaavoq.

Tele-Postiip Miiti Lynge taamatut oqaaseqarmat aqaguinnartoq oqarasuaatikkut attaveqarfigaa, taamatut oqaaseqarneranut uppernarsaatissanik ujartuiffigalugu. Kisiannili ulloq manna tikillugu taamatut oqaaseqarnerminut uppernarsaatissanik suli saqqummiussinngilaq.

- Tele-Postimi ulluni tallimani qinigassanngortittup oqaaserisaanut uppernarsaatissanik utaqqigaluareerluta, matumuuna Tele-Post-ip inunnut kalaaliunerat piinnarlugu itigartitsisarneranik oqarneq eqqunngilluinnartoq tamanut erseqqissaatigissavarput, Karl-Henrik Simonsen allappoq.

Powered by Labrador CMS