Ukiup arnatsialaa Sisimiuni najugaqarpoq
Nunat tamalaat akornanni marsip arfineq-pingajuanni arnat ulluannut tunngasup ataatsimiititaliap Anita Høegh toqqarpaat, taanna arnanut maligassiuivoq piumassutsini pissutigalugu. Taassuma arnat angutillu suliaannik allanngortitsisutut ingerlatsisimanera toqqaanermut aallaaviuvoq
Ippassaq marsip arfineq-pingajuanni nunarsuaq tamakkerlugu arnat ulluanni facebook aqqutigalugu ukiup arnatsialaa toqqarneqarpoq. Facebookimi qupperneq nutaaq pilersineqartoq aqqutigalugu ulluinnarni maligassiuisut qujaffigineqarnissamik naasunilluunniit naatsorsuutigisaqanngitsunut toqqarneqarsinnaapput.
Quppernermik pilersitsisut tassaapput Merete Smith-Sivertsen aamma Anette Lings.
Taakkua tallimanngormat Anita Høegh Sisimiuni najugalik toqqarpaat. Taakkua toqqaanerminni tunngavilersuutigaat Anitap sulerulunnermigut, niuertutut piginnaasaqarnermigut, nutaaliullaqqinnermigut kiisalu nunatta pinngortitaannit iluatinnartussarsillaqqinnermigullu Kalaallit Nunaata nunarsuarmiooqataanera umimmaat qiviuinik atorluaanermigut saqqumilaarsippai.
Taassuma Qiviut ApS Sisimiuniittoq pigaa, nuersagassaarniarfimmi tassani ilaatigut umimmaat nunatsinneersut Kalaallit Nunaanni aamma Europap annersaani nuersaajumatuunut tuniniagarai.
- Ukiup arnatsialaa uumasunik nuannarisaqarpoq islandimiut hiistiutaannik pingaartumik. Taamaakkaluartoq pinngortitami nukiit akiorsinnaaginnanngilai aammali biilit, qamuteralaat angallatillu sapinngisaqarfigai. Ukiup arnatsialaa naasulerituujuvoq, iggarilluni, kaattamut ajukkunnarani, motorilersinnaalluni suullu nuersarneqarsinnaasut tamaasa suliarisarlugit. Ukiut arnatsialaa arnaviuvoq nammineq qamannga nukissani kisiisa naatsorsuutiginngilai aammali motorinit nukit soqutigisaralugit. Tamatuna saniatigut qanigisaminik nakkutilliilluartuuvoq, toqqaaqatigiit Anita Høegh pillugu allapput.
Magasinap Arnanut 2012.imi Anita Høegh ilisaritippaa.