Skip to main content

Aalisartut AGF tununniarpaat

Maniitsumi aalisartut piniartullu akiliisinnaajunnaaqqasoq Arctic Green Food tatigiunnaavippaat. Suliffeqarfik ammaqqissappat tunisiffigisarnianngilaat

Nipisaat siulliit Nuummi Maniitsumilu aalisartut qassutaannut napittalereerput. Nipisaat suaasa tunisaanerat qanittumi aallartissaaq, sumiiffinnili Arctic Green Foodip saniatigut allanik tunisiffissaqanngitsuni akiliisinnaajunnaarneq annaasaqaataasussanngorpoq.

- Nipisaat suaat aalisartut ukiumut isertitaannut pingaaruteqartorujussuupput. Sumiiffinni arlalinni pitsaalaartumik isertitsinissamut periarfissatuaapput, Nuummi aalisartut piniartullu peqatigiiffianni NAPP-mi siulittaasoq Vittus Nielsen Sermitsiaq.AG-mut oqarpoq.

Nuummiulli inoqarfinnut allanut sanilliullutik inissisimalluarnerupput nipisat suaannik Royal Greenland tunisiffigisinnaagamikku sumiiffinni arlalinni Arctic Green Food kisimi periarfissaagaluartoq.

AAMMA ATUARUK: AGF-akiliisinnaajunnaarmat: Asii ungasissumut aaqqiissuteqaqqusivoq


Naammaleqaaq
Maniitsumi aalisartut siorna aggustimili Arctic Green Foodimut tunisiniarnerat ajornakusoorsimavoq. Maannalu nipisat siulliit qassutinut napittalerput.
Aalisarnermut piniarnermullu Naalakkersuisoqarfik nalunaarpoq Arctic Green Foodip ammaqqissinnaanera naalakkersuisunngortussat aatsaat isummerfigisinnaajumaaraat. Taamaammat aalisartut isertitassaraluaminnik annaasaqalertorsinnaapput nipisanniarneq martsip qeqqani aallartittarmat.
Taamaattoq Maniitsumi aalisartut Arctic Green Food ammaqqissagaluarpat tunisiffigeqqinnianngilaat.

- Arctic Green Food tunupparput. Kangaamiunukarusunneruvugut tassani Royal Greenlandimut tunisiartorluta, Maniitsumi aalisartut piniartullu peqatigiiffianni MAPP-mi siulittaasoq Kaassassuk Lyberth Sermitsiaq.AG-mut oqarpoq.

Taarsiiffigitinneq
Nipisanniarneq maajip naanerani qaangiuttarpoq tunisinissamullu periarfissaq maanna ammanngippat aalisartut isertitassaraluaminnik annaasaqassapput.

- Isumaqarpunga taarsiiffigineqarnissamik piumasaqarnissaq isumaliutigineqartariaqartoq. Tunitsivissaarunneq aalisartut pisuussutiginngilaat. Saarullinniarneq imminut akilersinnaarpianngilaq. Taamaammat isertitsinissamut nipisaat aalisartorpassuarnut periarfissatuaapput. Taamaammat taarsiiffigineqarnissamik piumasaqarnissaq isumaliugineqartariaqaraluarpoq, Vittus Nielsen Nuummiit oqarpoq.
 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER