Qallunaat: Kalaallit Nunaata aatsitassat nammineq oqartussaaffigai
Qallunaat innutaasut amerlasoorpassuit isumaqarput nunatsinni aatsitassanut nammineq oqartussaaffeqartugut
Qallunaat 70,1 procentii isumaqarput Kalaallit Nunaanni namminersorluni oqartussaanermut inatsisip 2009-mi eqqunneqarneranut atatillugu aatsitassanut oqartussaaffiup nunatsinnut tunniunneqarnera ajortussaqanngitsoq.
Tamanna Rambøll/Analysep Morgenavisen Jyllands-Postenimut paasiniaaneranit takuneqarsinnaavoq. Taamaallaat 21,7 procentit isumaqarput aalajaangiineq kukkunerusoq.
Tamanna Dansk Folkepartiimit tupaallaatigineqarpoq taakkua partiinit kisiartaallutik namminersornermut inatsimmik itigartitsimmata.
- Tupaallannartorujussuuvoq uanga taanna ilisarisinnaanngilara. Inuit oqaluukkaangakkit nalinginnaasunik kamassimassutigisaqaat Danmarkip Kalaallit Nunaata aatsitassanut oqartussaaffilersimammagu. Naluara inuit paasisimaneraat Kalaallit Nunaannut tapiissutinik milliardilikkuutaanik ukiuni aggersuni amerlasuuni akiliisussaasugut, aamma Kalaallit Nunaanni aatsitassanut suliniutinut akilersuisussaasugt, Dansk Folkepartip nunarput pillugu oqaaseqartartua Søren Espersen Jyllands-Postenimut oqarpoq.
Paasiniaanerup aallaavigaa qaammatini kingullerni naalagaaffeqatigiinnerup oqallisaaqqilernera aamma nunatsinni aatsitassat pillugit oqallinneq aallaavigineqarluni.