Ilinniusiat qallunaatut allassimapput

kalaallisut oqaatsivut kingumut oqallisaaqqileqaat. Inuussutissarsiornermik ilinniarfinni ilinniusiat nutsernissaannut aningaasaliisoqarli, Siumut sinnerlugu Inatsisartunut qinigassanngortittoq Marie Lyberth Mathiassen isumaqarpoq

Marie Lyberth Mathiassen Siumut sinnerlugu qinigassanngortittoq isumaqarpoq inuussutissarsiornermik ilinniarfinni ilinniutut kalaallisut oqaasertallit amigaataaqisut. Assi: Polfoto/Jesper Nørgaard Sørensen

Ilinniarfinni ilinniarnertuunngorniarfinnilu ilinniutit, immaqa faagi kalaallisut ilinniutit minillugit, qalllunaat nunaanniit pisiaallutik tikisinneqartarput, qallunaatut allataallutik, qallunaallu nunaanni, nunaniluunniit allani pissutsinnut tunngasuullutik.

Taama Siumut sinnerlugu Inatsisartunut qinigassanngortittoq Marie Lyberth Mathiassen tusagassiuutinut allppoq.

Isumaqarpoq oqaatsit pillugit oqallinnermi piviusunik angusaqarniaraanni ilaatigut ilinniutsiat nutsernissaannut aningaasaliisoqartariaqartoq.

- Ilinniutit oqaatsigut atorlugit aamma nunatsinnut tunngappata qularnanngilaq aamma kalaallisuinnaq oqaasillit aatsaat ilinniarnissaminnut periarfissagissaarnerulissasut, allappoq.

Maluginiarpaa namminersornerulernitta kingorna ilinniarfiit pilersinneqartut amerlaqisut. Taamaakkaluartoq atortut ilinniutit annerusumik allannguuteqanngillat, taakkununngami annertunerusumik aningaasaliisoqanngimmat

- Tassa qallunaat nunaaninngaaniit ilinniutinik pisiniartoqartarpoq, kalaallisut kalaallillu nunaanut tunngasunik ilinniuteqanngimmat.
Taamaammat inuussutissarsiutitigut ilinniarfinni atortussanik ilinniutinik suliaqarnissaanut, atuakkiornissamut, piorsaanissamullu aningaasanik amerlanernik aningaasaliisoqarnissaa pisariaqarpoq. Ilinniutillu nutaa massakkut atorneqartut saniatigut aamma atorneqarsinnaassapput, Marie Lyberth Marthiassen isumaqarpoq.

Powered by Labrador CMS