Aleqa allaqateqareernermi kingorna: Nuannerpoq tupaallannarlunilu
Siumup siulittaasua Aleqa Hammond marlunngornermi Sermitsiaq.AGp atuartartuinik nittartakkakkut allaqateqarmat inuit 1000 sinnerlugit malinnaapput
Aleqa Hammond, qungujulaqaluni marlunngornermi ualikkut Sermitsiaq.AGp atuartartuisa apeqqutaanik akisaqattaareerluni nikuippoq.
Nalunaaqquttap akunnerisa aappaata affaani Siumut-siulittaasuata 47-nik ukiullip apeqqutit 35-t akisinnaavai apeqqutilli amerlanerit akisinnaarusukkaluarlugit soorlu malinnaasorpassuarnut naggasiigami taamannak allattoq.
- Qujanarsuaq allaqatigiissinnaanitsinnut. Sukkanerusumik allassinnaassagaluarama taava apeqqutit amerlanerit akisimassagaluarpakka. Allaqatiginissassinnut periarfissinneqarama nuannerpoq, Aleqa Hammond allappoq.
Nuanneq, allaaneroq aamma tupaallannaq
- Allaqatigiinneq qanoq isumaqarfigaajuk aamma apeqqutit qanoq igaagit?
- Peqataaffigalugu nuanneqaaq aamma inuit sunik soqutigisaqarnersut atuarlugit pissanganarpoq. Ullumikkut allaqateqareernerma kingorna paasisinnaavara aatsitassat, aningaasaqarneq aamma ilinniartitaaneq soqutigineqartorujussuusut. Suliffissaaleqineq aamma Kalaallit Nunaannit qimarranneq imartoqaat.
- Qinersisartunik ataatsimiisitsinermit ullumi pisup suna allaanerussutigaa?
- Aap! Tupaallaatigaara piffissami kingullermi pinerlunniarneq ingasatsikkiartortoq oqallinnerni annermik oqaluuserineqannginnera, nalunatigu suliffissaaleqisut amerliartortillugit pinerlunniartartut amerliartortarmata. Tamatuma saniatigut oqallinnermi takorusukkaluarpara aalisarnermik inatsisip annermik sammineqarnissaa pisassiissutillu initunerunissaat, Aleqa Hammond oqarpoq.
Sisamanngorpat Kuupik allaqatigigiuk
Sisamanngorpat IAp siulittaasua aamma Naalakkersuisut siulittaasorigallagaat Kuupik Kleist taamatut toqqartaarneqarnissaminut piareersimassaaq. Tamanna pissaaq maani Sermitsiaq.AGmi nal. 12.00 aamma 13.00 akornanni.
Atuartartut apeqqutaat tamaasa Aleqa Hammondillu akissutai tamaasa uani atuakkit: