Skip to main content

Illuatungeriit akioriinneranni ajugaasoqanngilaq

Marlunngormat illuatugeriit akioriinneranni naalakkersuisut siulittaasorigallagaat Kuupik Kleist, IA, illuatungeriillu siulittaasuat Aleqa Hammond, Siumut, malunnaatilimmik ajugaasoqanngillat.

Nuummi Ilimmarfimmi illuatugeriit siullerpaamik akioriinneranni marlunngormat, Naalakkersuisunut siulittaasuugallartoq Kuupik Kleist, Inuit Ataqatigiit imaluunniit unammillertaa Siumut siulittaasua Aleqa Hammond arlaannaalluunniit imminnut taasinnaaput ajugaasutut.

Ilimmarfiup kantinaani issiaviit nalunaaquttap affaa sioqqullugu ulikkaangajapput, qularnanngitsumik siullerpaamik taama oqallititsisoqarneranut qinersisartut pissangasut.

IIeqqoq malillugu partiit erfalasuarai atorneqanngillat nilliasoqartarnanilu, piffissami annerpaami qinersisartut nipaalluinnarput. Kisianni qinersisartut malittarisassat malivinngilaat, tassami ilaatigut qineqqusaartut oqaaseqareeraagata pattaattoqartarami, ingammik Siumukkormiunut tapersersuisut pattaattarlutik.

KNR-ip apeqqutai

KNR-imit apersuivoq tusagassiortoq Stina Skifte, apeqqutigivai inuussutissarsiornermut tunngasut, aalisarneq, aatsitassaqarneq qanorlu nunatta siunissaa takorloorneraat.

Aperivai nunarput aningaasarsiulissappat qanoq isiortoqassanersoq, akissutaallu aalisarnermut sangupput. Naalakkersuisut siulittaasorigallagaat Kuupik Kleist akeqqaarpoq:

- Ukiuni kingullerni raajanik pisassiissutigineqartartut annikillisimapput, taamaammat takorlooruminaappoq aalisakkanik tunisassiorneq qanoq isilluni annertusarneqarsinnaasoq. Makrelit ammassassuillu raajat tunisaasarneri taarsersinnaanngilaat. Allanik aningaasarsiorfissatsinnik nassaartariaqarpugut. Siumup siulittaasuata Aleqa Hammond allatut isumaqarpoq:

- Aalisarnerup iluani nutaamik eqqarsartoqanngilaq. Pinngortitaleriffimmi biologit Namminersorlutik Oqartussanut siunnersuisinnaasut amerlisariaqarput. Sineriammi pisassiissutit annikippallaaqaat, piffissanngorpoq aalisartut tusaaneqarnissaat taamaasilluta aalisakkat isaatitsissutiginerussavagut.

Kuupik Kleistip ileqquni malillugu apeqqutit eqqissilluni akisarpai Aleqa Hammondilu ileqqumisut nipaa eqqissisimanerusarpoq.

Aatsitassat

KNR-imit apersuisoq: Qanoq isilluta qularnaarsinnaavarput aatsitassaatitta iluanaarutiginissaat? Kuupik Kleistip apeqqut akeqqaarpaa. 

- Siullerpaamik avataaniit aningaasaliisussanik pisariaqartitsivugut, uagut taamaasiorsinnaannginnatta. Upperilluinnarpara suliffeqarfissuit kissaatigigaat akileraarut atorlugu nunatta aatsitassaatigut iluanaarutigissagai. 

Aleqa Hammond: Aatsitassaatigut akeqanngitsumik piiarneqassanngillat, taamaammat akileraarutip saniatigut ilanngaatinik piumasaqartariaqarpugut. Isumaqanngilanga suliffeqarfissuit qimarngutilissasut ilanngaammik piumasaqarutta.

KNR-imit apersuisoq: Akueriinnassavarput Nuup eqqaani mingutitsisoqarnissaa.

- London Miningip saviminissamik Isukasiata eqqaani piiaalinnginnerani misissueqqaartoqartariaqarpoq, akuerisinnaanngilara mingutitsisoqassappat, Kuupik Kleist tikkuaavoq.

Aleqa Hammond: Avatagiisit pilliutigissanngilagut, aatsaat aatsistassamik piiaasoqalissaaq isumannaallippat mingutitsisoqassanngitsoq. Mingummut milluaatit oqartarnerattut pitsaatiginngillat tassa Nuup eqqaa mingutsinneqassaaq.

KNR-imit apersuisoq: Kikkut qinersereernerup kingorna suleqatigiissavisi?

Kuupik Kleist: Partiit tamaasa ammaffigaagut, qinersisartut aalajangissavaat partii sorleq annerpaanngussanersoq, kingornalu naalakkersuisunngortitsisoqassaaq, Kuupik Kleist oqarpoq.

Aleqa Hammond: Nuannaarutigaara IA'p isumaa allanngorsimammat tassa partiit tamaasa ammaffigimmatigit. Siumut tamanut ammasuaannarpoq. IA Siumullu sorpassuartigut isumaqatigiipput, qinersereernerup kingorna aalajangissavarput kikkut suleqatigerusunnerlutigit.

Facebookimit apeqqutit

Qinersisartup Aleqa Hammond aperaa qaqugu nunarput qinersereernerup kingorna namminiilivissanersoq.

- Namminiilivinnissaq sulissutigissavarput. Uanga inuuninni misigerusuppara nunarput naalagaaffinngortoq. Pilersaarutaanngilaq qinersinermi eqqartorneqassasoq tamanna. 

Kuupik Kleist: -Massakkut namminiilivinnissamik piumasaqanngilagut, qinersisartut tamanna aalajangissavaat qaqugu. Kisianni aningaasaqarnikkut namminiilernissaq sulissutigissavarput.

Alla qinersisartoq aperivoq qaqugu kalaalimerngit akikinnerulissanersut.

- Inuussutissanik inatsit angerlaassavarput, taamaasilluta nammineq tunisassiaattitta akiii aalajangersorsinnaanngussavagut qanorlu avammut tunisassiarissanerlugit, Siumup siulittaasua Aleqa Hammond oqarpoq.

- Upperinngilara inatsit angerlaakkutsigu tunisassiagut akikinnerulissasut, Naalakkersuisut siulittasuat Kuupik Kleist oqarpoq.

Periarfissaq kingulleq

Qinigassanngortittut minutsi ataaseq periarfissinneqarput kingullerpaamik illuatugeriinnerminni oqaaseqassallutik.

Aleqa Hammond 47-nik ukiulik siulliulluni oqaaseqarpoq: 

- Uanga alliartorpunga anaanaqarlunga aningaasatigut pissarissaanngitsumi, sulisartuuvoq sulerulunnikkut taamaammat sulisartut atugarisaat ilisimasaqarfigaakka.

Kuupik Kleist 53-nik ukiulik oqarpoq:

- Uanga uannut eqqartornianngilanga. Ukiut sisamat kingullit suliakka qinersisartunik nalilersorneqassapput. Qinersisartut nalilissavaat naalakkersuisut siulittaasunngoqqissanersunga.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER