Arctic Green Foodip matunissaa ernumagaa

Arctic Green Foodip akiliisinnaajunnaarnera Jacob Abelsenip ernumanartoqartippaa

Atassummit Jacob Abelsen, Arctic Green Foodip akiliisinnaajunnaarnera ernumanartoqartippaa. Assi.: Facebook

- Arctic Green Food matussappat ilaqutariit 200-t eqqorneqassapput.

Arctic Green Foodip tallimanngornermi sapaatip akunnera kingullermi akiliisinnaajunnaarmat, Jacob Abelsen Atassut sinnerlugu Inatsisartunut qinigassanngortittoq, pisoq pillugu oqarpoq.

Atassut tunuliaqutaralugu politikkeri isumaqarpoq, Naalakkersuisut pisooqataasut Arctic Green Foodip maannakkut inissisimaffianut.

- Naalakkersuisuusut naalakkersuisunngormatali Arctic Green Foodimut tapiissutigineqartartut ukiuni kingullerni annikilliartuinnavissimapput, 2009-mi 12,9 million koruunit tapiissutigineqarlutik, 2013-imilu 7 million koruuniullutik. 2014-imilu Naalakkersuisut tapiissuteqarniarnatik.

Matusineq sunniuteqangaartoq

- Ilaatigut malunnartarpoq soorluuna Naalakkersuisut landskarsi pinnguaarniarfittut aqukkaat, soorluluunniit sinneqartoorniaannarlutik ingerlasut, Jacob Abelsen tusagassiutinut nalunaarummi nalunaaruteqarpoq.

Arctic Green Foodip matuneqarnissaa Jacob Abelsenip ernumagaa, isumaqarami matusineq inuiaqatigiinnut sunniuteqapilussinnaasoq. Atassut sinnerlugu politikkeri isumaqarpoq, Arctic Green Foodip matusariaqarnera inuiaqatigiinnut akisussasoq, tassami inuit amerlanerusut illoqarfinnut anginerusunut nutsertariaqalissammata kiisalu Arctic Green Foodip 40 million koruunit kaaviaartitassaagalui annaaneqassammata.

Naalakkersuisunut isornartorsiuineq

Kommuneqarfik Sermersooq Arctic Green Foodilu isumaqatigiissimagaluarput suleqatigiinniarlutik, tassani Ittoqqortoormiuni umimmaat tunisassiorfiat allilerniarneqaraluarmat.

Jacob Abelsen isumaqarpoq Naalakkersuisut Ittoqqortoormiuni umimmannik tunisassiorfiup piviusunngunngitsoornissaanut pisooqataasut.

- Illoqarfittut tamaat Ittoqqortoormiut eqqorneqassaaq umimmannik tunisassiorfik allilerneqanngippat. Naalakkersuisut Arctic Green Foodi pisuutiinnarsinnaanngilaa sullissinermut isumaqatigiissut piviusunngunngitsoorpassuk. Naalakkersuisut namminneerlutik tapiissutigineqartartut annikillinikuuaat, Jacob Abelsen oqarpoq.

Sermitsiaq.AG Arctic Green Foodip aqutsisua Otto Stach, siulersuisunilu siulittaasoq Rasmus Haugaard oqaaseqartinniartaraluarpai iluatsinngitsumik.

Powered by Labrador CMS