Piginneqataasut annaassiniarnissamut piareersimapput
Ingerlatsivimmi ilungersunartorsiortumi aningaasaliisut aalajangiuppaat aningaasat tigoriaannaat 5,2 mio. kr.-inik ilaniarlugit - taamaaliortoqassappalli Aalisarnermut, Piniarnermut Nunalerinermullu pisortaqarfimmit 2,1 mio. koruunit tunniunneqarnissaat
Arctic Green Food piffissami matumani ataannarsinnaajumalluni ilungersunartorsiorpoq.
Taamannak pisoqalerpoq siorna nipisaat suaasa aamma aalisakkat tarajortikkat akiisa appariarujussuarnerisa kiisalu pisiarineqarsimasunik naammagittaalliortoqartarnerata kingorna ingerlatsivik 2012-imi amigartooruteqangaatsiarmat.
Tamatuma saniatigut Arctic Green Foodip kiffartuussinissamik isumaqatigiissutaa 2013-imut 4 millioner koruuninik appartinneqarsimavoq tamatuma nassataanik ingerlatsivik suli ilungersunartorsiornerulerluni.
Tamakku aamma Aalisarnermut, piniarnermut nunalerinermullu naalakkersuisoqarfimmik isumaqatigiinniarnerit iluatsinngitsoortut aamma kiffiartuussinissamik isumaqatigiissutip ukioq mannamoortup ajorseriaateqarnerata nassataanik Arctic Green Food, AGF piffissami matumanerpiaq aningaasanik tigoriaannarnik ajornartorsiuteqartoq, ingerlatsiviup feriepengenut, suannut bonusisiassat aamma qaammatini kingullerni akileraarutinut akiliutissaminik amigaateqartoq.
Aningaasaliiffigineqarnissamu akornusiisut
AGF-imi piginneqataasut sapaatip-akunnerani uani aalajangiuppaat ingerlatsivimmut aningaasanik tigoriaannarnik 5,2 millioner koruuninik amerlanernik ilanngussaqarniarlutik.
Piginnittulli 5,2 millioner koruuninik ilanngussaqassagunik 2,1 millioner koruunit kiffartuussinissamik isumaqatigiissutip sinnerisai Aalisarnermut, Piniarnermut Nunalerinermut Naalakkersuisoqarfimmit pissarsiareqqaassavaat, Otto Stach, tunisassiornermi pisortaq ulluinnarnilu Arctic Green Food A/S oqarpoq.
Piginneqataasut pisortaqarfik kaammattorusuppaat politikerit maannamut AGF'imi pissutsinik ilisimatinneqarnissaat, AGF ajutuussagaluarpat aalisartunut, piniartunut, suleqatinut aamma pilersuisunut ajortumik sunniuteqartussaammat.
- Eqqaatitsissutigerusupparput sakkortuumillu erseqqissaatigalugu Royal Greenland ukiualuit matuma siorna taamannak ajornartorsiormat namminersorlutik oqartussanit 500 millioner koruuninik ikiorserneqarmat, Otto Stach oqarpoq.