Atassummit qinigassanngortitoq: isorliunerusuni timersortartut ikiorneqarlik

Isorliunerusuni timersortartut piginnaanillit sapinngisaminnik takutitsinissamut pitsaanerusumik periarfissinneqarlik.

Taama Atassut sinnerlugu Inatsisartunut qinigassanngortittoq, Ove Thomassen, kaammattuuteqarpoq.

Politikeri Atassummeersoq volleyballimi nuna tamakkerlugu sungiusaasuuvoq, isorliunerusunilu timersortartut angalanissamut tapiiffigineqartarnissaannik ujartuilluni.

- Timersuutini tamangajanni illoqarfinnit anginerneersut nunanut allanut unammisartunngortarput periarfissarissaarnerulutillu atortorissaarnerusaramik. Kisianni isorliunerusuni timersortartut piginnaasaminnik takutitsinissamut periarfissinneqarnissaannut piffissanngorpoq. Nalunngilara isorliunerusuni pikkorissorpassuaqartoq, kisianni piginnaasaminnik takutitsisinnaanngillat angalanissamut akissaqartannginnamik, Ove Thomassen Sermitsiaq.AG-mut oqarpoq.

Nunanut allanut unammisartoq Tasiilameersoq
Nunanulli unammisartunngornissamut tunngavissat pitsaavallaanngikkaluartut taamaattoq tamatuma pisinnaaneranut qujanartumik assersuutissaqarpoq.

- Tasiilami voleeyballertartut ingerlalluartutut ilisimaneqanngillat, kisianni ingerlallualersimapput. Allaallu taakkua ilaat nunanut allanut unammisartunngorsimalluni. Sungiusarnerup qanoq imminut akilersinnaatiginera tassuuna takutinneqaannarpoq, qularinngilaralu nunatsinni allanik aamma pikkorissoqartoq toqqorsimaannartunik, aamma timersuutit allat iluanni, Ove Thomassen oqarpoq.

Ove Thomassen erseqqissaalluni oqarpoq, isorliunerusut angalanissamut tapiiffigineqartaleraluarpata tamanna tamanut iluaqutaassasoq.

- Isorliunerusuni nunaqarfinni illoqarfinniluunniit susassaqartoqanngikkaanga inuusuttut aanngajaarniutinik atuinialersarput. Timersortartut tapiiffigineqartaleraluarpata, tamanna nunaqarfinnut illoqarfinnulluunniit iluaqutaarujussuassagaluarpoq, Ove Thomassen oqarpoq.