Immitsinnut nassaarisariaqarpugut

Future Greenlandip ingerlanneqarneranut atatillugu kingullertut oqaaseqarsinnaaneq aamma saqqummiussisinnaaneq Kalaallit Nunaata siunissaa pillugu, Inga Dóra Gudmundsdóttir Markussenimut mersernarpallaarpoq, taanna ilaatigut Tusagassiivimmi Sermitsiaq.AG’mi siulersuisunut ilaasortaavoq. Illuatungaani Kalaallit Nunaata unammilligassai facebookimini allaaserai.

Inuiaqatigiinni marloqiusani inuuvugut. Piviusunut assigiinngitsumik paasinnittaaseqarluta taannalu tassaagunarpoq unammilligassat oqimaannersaat suliariniartariaqagarput. Marloqiusanik oqarninnut isumaqarpunga:

- Pissutsini piviusuni inuuffigisatsinni inuiaqatigiinni ingerlatsinermi qallunaat oqaasii oqaatsitut annertoorujussuarmik atorneqarput soorlu ataatsimeersuarnermi tusarliunneqartutut. Taava inuiaqatigiinni immikkoortoq alla tassaavoq kalaallisut oqaluffiunerusoq, ataatsimeersuarnerup avataani takussaasoq.

- Inuiaqatigiit marluiit taakkua imminnut nassaarineq ajuleqqapput oqaatsit assigiit atunnginnamikkik taamaattumilllu unammilligassaqaqalutik. Uanga oqaatsit marluiit atorsinnaavakka, assigiimmik pitsaassuseqanngitsumik kisianni silarsuit marluk iluanni paasineqarsinnaanerup killingani, Inga Dóra Gudmundsdóttir Markussen allappoq, oqaatsit eqqarsaatigalugit inuiaqatigiinni illuatungiliuttuni marlunni inissisimasoq.

- Ilungersinarsiartuinnartutut isigaara silarsuit taakkua marluk akornanni quppaq alliartormat. Tamanna aamma tusagassiiviit oqalliffiini takussaavoq. Oqarusuppunga naleqartitavut pillugit saatsinni oqalittoqartoq. Tamatuma saniatigut amerlasoorpassuarnit ujartorneqarpoq aamma inuussutissarsiortunut naleqartitat pillugit oqallinnerit aamma maani FBmi ingerlanneqarput assigiinngisitaartumik iluatsitsiffiullutik.

Taakku uagullu
Ingap tikkuarpa naleqartitat pillugit oqallinneq immini inuiaqatigiinnik avissaarsimasunik ersiutaasut pissutigalugu ’uagut taakkualu’ pillugit imaqarmat.

- Kalaallisut oqalussinnaanngitsut – qallunaatut oqalussinnaanngitsut. Silarsuagut ima imminnut ungasitsigaat allaat ilaanni ima eqqarsarlunga malugisarpunga: Una suliarineqarsinnaanngilaq. Qanoq isilluta inuiaqatigiinni immikkoortut marluiit imminnut saatsissavavut. Eqqarsartaaseq ’taakkua uagullu’ niaqunni aatsaat taama initutigilerput. ’Nuuk sinerissallu sinnera’. Qallunaat kalaallillu.

Nunatsinni ataasiinnarmik oqaasillit ineriartornermi kivitseqataassagunik aatsaat taama imminnut pisariaqartitsigipput, Dóra Gudmundsdóttir Markussen, allappoq aamma isumaqartoq ataatsimeersuarneq Future Greenlandimit pissarsiaq tassaasoq, imminut nassaarinissamut pisariaqartitsineq.

Sermitsiaq.AG,i Future Greenland pillugu allaaserisat uani atuakkit

Pissutigalugu Inga Dóra Gudmundsdóttir Markussenip erseqqissaaneratut, ineriartornermi peqataatitsisoqartussaavoq peersitsisoqarani. Ataqqinnissinnaanermilli pisariaqartitsisoqarpoq, Inga allappoq.

Tamarmilli peqataasariaqarput – inuiaqatigiinni immikkoortut marluiit. Ukiuni makkunani avissaariartornerput annertusiartorpoq immaqa inuiaqatigiinni assigiinngitsumik atugassaqartitaaneq annertuallaaqimmat. Taamaattumik Future Greenlandimi pingaarnerpaatut inerniliuunneqartoq aamma tassaavoq innuttaasut peqataatinniarnissaat ukiuni aggersuni ilungersuunneqartariaqartoq. Kisianni oqaatsit aamma immitsinnut paaseqatigiinnissarput amigaataatillugu suliassaq aatsaat taamak ajornatigissaaq.

Uannut pingaaruteqartorujussuuvoq oqassallunga uagut silarsuarmik paasinnittaaserput aallaavigalugu immitsinnut tatigeqatigiittariaqarpugut, qularutiginngilara inuiaqatigiinni innuttaasut tamarmik tamanna kissaatigigaat inuiaqatigiit nunarsuarmiooqataaleriartorisa aqqani.

- Suna pineriga paasivisiuk? Imaluunniit kukkusorujussuuvunga, Inga Dóra Gudmundsdóttir Markussen aperivoq.