S: Meeqqat atuarfiata kingorna periarfissat amigaataapput

Mette Rasmussen Larsenip Siumut sinnerlugu qinigassanngortittup meeqqat inuusuttullu meeqqat atuarfiani soraarummiinngitsoortut periarfissaqarnissaat sulissutigerusuppaa

Mette Rasmussen Larsenip Siumut sinnerlugu qinigassanngortittup meeqqat inuusuttullu meeqqat atuarfianik soraarummeersimanngitsut periarfissaat sulissutiginiarpai. Assi: Leiff Josefsen

Mette Rasmussen Larsenip Siumut sinnerlugu Inatsisartunut qinigassanngortittup meeqqat atuarfia taassumalu kingorna periarfissat pitsanngorsarusuppai. Ingammik meeqqat inuusuttullu immikkut pisariaqartitsisut periarfissaat ujartorpai.

- Naak meeqqat meeqqat atuarfiani angusarissaaraluartut amerlasuut sumiginnarneqartarput. Ingammik meeqqat immikkut pisariaqartitsisut nunatsinni periarfissanik amigaateqarput, Sermitsiaq.AG-mut oqarpoq.

Maniitsumi efterskole immikkut ilinniartitsinissamut arfineq pingasunut inissaqarpoq, taassumali saniatigut nunanut allanut aallartoqartariaqarpoq. Tamanna naammanngilaq, Mette Rasmussen Larsen isumaqarpoq.

Innarluuteqarneq pillugu ilisimasaqarfimmut siunnersuisarfimmullu saaffiginnissimavoq tassanilu paasitinneqarpoq meeqqat arlaqartut ADHD-mik, autismemik Aspergers syndromimillu nappaateqartutut nalunaarsorneqarsimasut. Aamma ilaat naqinnernik ilisarsisinnaanngillat nalinginnaasumillu ilinniarsinnaanerminnut ajornartorsiuteqarlutik.

- Meeqqat tarnimikkut nappaateqartut taakkuugajuttarput meeqqat atuarfianik naammassinninngitsut. Ikiorneqanngikkunik inuunerminni alloriaqqinnissaminnut piareersimanngillat. Tamanna nunatsinni amigaatigaarput. Ikiorneqanngikkunik inersimasunngorunik ilinniagaqarsimasuunavianngillat sulisinnaanatillu, allaat pinerlunniartunngorsinnaallutik atornerluisunngorlutillu, Siumumiit naalakkersuinermik sulialik mianersoqqusiavoq.

Taamaattumik isumaqarpoq inuusuttut unittoorsimasut inuiaqatigiinni ikiorneqartariaqartut.

Ilisimasaqarnernissaq ujartorpaa
Mette Rasmussen Larsenip erseqqissarpaa taamatuminnga suliaqartut pikkorissuusut, atorfissaqartitsisunulli naleqqussakkamik ilinniartitsinissaminnut ilisimasaqarnerunissaat kissaatigaa.

- Isummat nutaat pisariaqarput. Piviusorsiunngitsumik innarluutilinnut ingerlatsivissuarnik pilersitsinianngilanga, maannakkullu suleriaatsit atorneqartut imaanngilaq isumaqatiginngikkikka. Tarnikkut nappaatinik suliaqartut pikkorissuupput, ilisimasaqarnerusariaqarpugulli. Pikkorissartariaqarput, ilinniaqqissappatalu tapersersortariaqarpavut, Mette Rasmussen Larsen oqarpoq.

Siullermeerluni qinigassanngortittoq isumaqarpoq ilisimaatsuuneq meeqqamut ilinniartitsisunullu annertuumik ajornartorsiutaasoq.

- Naak amerlanerujartortut tarnimikkut ajuuteqaraluartut ilinniartitsisut taakkuninnga ilinniartitsinissaminnut pikkorissarneqarneq ajorput. Ullumikkut ilinniartitsisut artornarsiorput sulinissaminnullu pitsaanerusunik tunngavissittariaqarpavut. Taamatummi aamma meeqqat piginnaasaat ineriartorluarnerussapput, Mette Rasmussen Larsen oqarpoq.

Isumaqarpoq ullumikkut inuusuttut amerlavallaat meeqqat atuarfiat naammassineq ajoraat.

- Meeqqat atuarfiat meeqqap siunissami piginnaasaqalernissaanut tunngavissaavoq, taamaattumik meeqqat atuarfiat inuiaqatigiinnut pingaartuuvoq, oqarpoq erseqqissarlugulu angajoqqaat aamma meeqqap ineriartorneranut pingaarutilimmik inissisimasut. Isumaqarpoq meeqqat atuarfiat pingaarnerpaasoq.

- Meeqqat inuusuttullu meeqqat atuarfiat naammassisariaqarpaat pisarialinnik piginnaasaqarlutik, maannakkummi naammanngillat. Piareersarfimmut utaqqisorpassuupput ilaallu ukiuni marlunni utaqqisariaqartarlutik, oqarpoq.

11. klassip atuuteqqilernissaa eqqarsaatigaa
Mette Rasmussen Larsenip Piareersarfimmut utaqqisorpassuaqarnera takussutissaasoraa inuusuttorpassuit meeqqat atuarfiat qimattaraat suli periareernatik.

- Pisariaqassappat isumaqarpunga 11. klassip atuuteqqilernissaa eqqarsaatigeqqinneqartariaqartoq, soraarummeernissaannut piareersarsinnaaniarlugit. Meeqqaat atuarfiat qimakkunikku meeqqat anguniartariaqanngilaat Piareersarfimmiinnissartik, oqarpoq.
Mette Rasmussen Larsen isumaqarpoq kikkut tamarmik assigiinnik periarfissaqartariaqartut amerlavallaat sumiginnarneqartassanngippata.

- Meeqqat ilaat naleqqussarnissaminnut allaniit pisariaqartitsinerusarput. Tamannalu meeqqat atuarfiata isumagisariaqarpaa. Inuusuttut unittoornissaat pinaveersaartariaqarparput. Meeqqat klassini immikkut ittuniittut kisiisa eqqqarsaatiginngilakka aammali meeqqat immikkut pisariaqartitsisut. Taakku ikiunngikkutsigik sumut pissappat?

Powered by Labrador CMS