Qaqortumi blokkimi inissiaqarfimmi ikuallattoqartoq
Qaqortumi politiit sapaatip akunnerata naanerani ulapissimapput, ilaatigut blokkimi inissiaqarfimmi ikuallattoqarsimavoq
Arfininngornerup sapaatillu unnuaanni nalunaaqutaq 01.38 Qaqortumi politiit qatserisartullu Qaavani blokkimut inissiaqarfimmut blok 5-imi ikuallattoqartoq nalunaarfigineqarput, tassani inissiaq ikuallammat pujuliortorujussuulluni.
- Najugaqartut tamarmik inissiaq qimassimavaat. Najugaqartut saniliilu aallarunneqarput Ini-millu allamut inissinneqarlutik, politikommissær nunallu immikkoortuani, Politiregion Syd-imi, pisortaq Bent Ole Kleist oqarpoq.
Inissiap initaa nunguilluni ikuallappoq, inillu allat putsumik ajoqusertorujussuullutik.
Aamma atuaruk "Qaqortumi angut nuliaminit savimmik kapinneqarluni toqutaasoq"
- Maanna misissuisoqarpoq paasiniarlugu ikuallanneq qanoq pilersimanersoq, Bent Ole Kleist nassuiaavoq, ilanngullugulu nalunaarutigaa akissarsiat tunniunneqarnerannut atatillugu sapaatip akunnerata naanerani ulapissimallutik, ilaatigut illumi perulluliornernik, inunnik aalakoortunik aqqusinermilu perulluliortunik.