Bibi takutitsisoq

Isiginnaartut 450-t Bibi Chemnitz'p atisaliai takuaat tallimanngornermi unnukkut Københavnimi Børsenimi ulikkaavittumik takutitsimmat

Ivalu Sørensen tujuuluaraqarluni 'Home Sick'-mik allagartalimmik Bibi Chemnitzimit ilusilersukkamik. Foto: Arktis Media

Atisanik nutaalianik allaaserinnittartut assiliisartullu inissat pilernguppaat tallimanngornermi unnukkut Copenhagen Fashion Showimi atisanik saqqummersitsinermi Børsenimi ingerlanneqartumi Bibi Chemnitz atisaliaminik takutitsimmat.

Saqqummersitsinerup aallartinnerani isiginnaartut taap ataaniitinneqarput - taamaallaat skærmerujussuarmi nunatsinni pinngortitami qimussertut takuneqarsinnaallutik. Tamanna nipilersornertaqarpoq. Tassanngaannarlu nipilersorneq taarlu allanngorput 'Bibi Chemnitzimik' allassimasumik seqersimalerluni.

Atisanillu takutitsineq aallartippoq arnat nalinginnaasut pinnersulli takutitsillutik. Tupinnanngitsumillu 29-nik ukiullip Bibi Chemnitz atisat nutaaliat silarsuaanni suliaminik malugineqarpoq. Atisaliai pitsaarpasipput ingasattajaarnatilli, inuusuttunut tulluartut.

Bibi Chemnitz atisaliornerup silarsuaani taaneqartarpoq 'upcoming', nutaajulluni suli ilisimaneqanngitsoq. Ilisimaneqanngivinngilarli, nunatsinni Danmarkimiluunniit. Aarhusimi namminerisaminik niuertarfeqarpoq '2006', Japanimi, USA-mi, Tysklandimi, Frankrigimi Italiamilu pisisartoqarluni.

Powered by Labrador CMS