GME-p pisortaa tunuarpoq
Greenland Minerals and Energyp pisortaanera Ole Ramlau-Hansen ingerlaannavik atuutilersumik tunuarpoq
Ole Ramlau-Hansen aatsitassarsioqatigiiffimmi Greenland Minerals and Energy Trading A/S-imi ullumikkumit atuutilersumik pisortaanerujunnaarpoq.
Tamatuma saniatigut selskabip Nuummi qullersaqarfiani sulisut pingasut marsimi apriilimilu soraassapput.
- Ole Ramlau-Hansen suleqataalu selskabip ineriartortinneqarnerani pingaaruteqarluarsimapput, GME-p siulersuisuini siulittaasoq Roderick McIllree tusgassiorfinnut nalunaarummi allappoq.
McIllree naapertorlugu Ole Ramlau-Hansen pisortaanertut tunuarpoq inuussutissarsiornikkut soqutigisani allat aallunniarlugit.
Shaun Bunn, maanna Greenland Minerals and Energy Ltd-mi (GGG) ingerlatsinermut pisortaq, GME-mi pisortaaninngussaaq. Shaun ukiuni kingullerni sisamani Kuannersuarni aatsitassanik qaqutigoortunik misissuinerup atasinnaaneranik nalilersuinerup ilarujussua suliarisimavaa.
Aamma siulersuisut siulittaasuat taarserpoq
Australiamiut aatsitassarsioqatigiiffianni taarsiinernut nikisitsinernullu atatillugu GME-p maanna siulersuisuni siulittaasua Roderick McIllree Dr. John Mair-imit taarserneqarpoq. McIllree siulersuisuni ilaasortaannartut inissippoq.
Tamatuma kingorna Greenland Minerals and Energymi siulersuisut tassaalerput siulittaasoq John Mair kiisalu siulersuisunut ilaasortat Mike Hutchinson, Tony Ho aamma Roderick McIllree.
Atuaruk "Uranimut akuersaannginneq IA-p aalajangiusimavaa"
Akuersaannginnermik politikki aporfissiivoq
Soorli taamatut taarsiisoqarlunilu nikisitsisoqarpa?
- GME-p maanna uranimut politikkip nangillugu oqaloqatigiissutigineqarnissaa ataatsimiititaliallu suligasuartup inerniliinissaa utaqqivai, avatangiisinut, inunnut aningaasatigullu Kuannersuarni Suliniutip nalilerneqarnissaanut. GME isumaqarpoq uranimik piiaanermut atatillugu sammisassanik attuumassuteqanngitsup naliliinissaata siuarsarnissaanik politikerit 2012-imi novembarimi tamakkiisumik tapersiinerat alloriarneq pitsaasuusoq. Akuersaanngitsumik politikkip atorunnaarsinneqarnissaanik ersarissumik politikkikkut nalunaaruteqartoqarpat tamanna selskabip malunnartumik allinissaanut aqqutissiuussissaaq, Greenland Minerals and Energy Trading oqarpoq.