Skip to main content

Aatsitassanik immikkut ilisimasallit inissipput

Ilisimatooq Torben M. Andersen naalakkersuinermik suliaqartunut immikkullu ilisimasalinnut siulluuttaaq aatsitassanik akileraarusiinermik misissuisussani  

Naalakkersuisut ilisimatooq Torben M. Andersen aatsitassanik akileraarusiinermut atatillugu immikkut ilisimasalinnut siuttussatut toqqarpaat.  

Immikkut ilisimasallit tassaassapput inuit nunat tamat akornanni akileraartarnermut kiisalu uuliasiornermik aatsitassarsiornermillu pissutsinik ilisimasallit. 

Immikkut ilisimasallit sulinissaminnut najoqqutassaasa akuerinerisigut naalakkersuisut nunatsinni aatsitassanut periusissanik siunnersuinerup arlaannaannulluunniit attuumassuteqartuunnginnissaa qulakkiissavaat. 

Aningaasaqarnermut naalakkersuisoq Maliina Abelsen Inuit Ataqatigiinneersoq naapertorlugu immikkut ilisimasalinnik pilersitsinermi siunertaavoq 'arlaannaannulluunniit attuumassuteqangitsunit siunnersuinermik pissarsinissaq aatsitassanut uuliamullu periusissiassat 2015-imiit atuutilersussat suliarineranni atorneqartussanik kiisalu erngup nukinga atorlugu nukiliornermi periusissiassamut siunnersuutinik pissarsiniarnermi'.  

Immikkut ilisimasallit marlunnik suliaqassapput:

  • Immikkut ilisimasallit siullertut suliffeqarfinnut akileraartarnermut inatsisit maannakkut atuuttut misissussavaat nalilersorlugillu, paasiniarlugu inatsisit aatsitassanut suliniutini suliffeqarfiit akileraarneranni isertitanik nunarput naammattumik pissarsissanersoq. Aamma suleqatigiit nalilersorlugu innersuussiffigissavaat akileraartarnikkut nakkutilliineq, suliffeqarfiit eqqortumik akileraartarnersut qulakkeernialugu. Immikkut ilisimasallit suliassaqarfimmi tassani innersuussinerat kingusinnerpaamik tunniunneqassaaq apriilip 1-at 2014 tikitsinnagu.  
     
  • Immikkut ilisimasallit aappaattut suliassaraat siunissami aatsitassanut, kulbrintenut erngullu nukinganut akileraariaatsimut periusissatut innersuussinissaq. Periusissiaq taanna maannakkut ujaasinissamut akuersissutaareersunik ataqqinnissaaq kiisalu qulakkeerlugu nunatsinni nunarsuarmi unammillersinnaasunik piumasaqaateqarnissarput. Innersuussinerat kingusinnerpaamik tunniunneqassaaq apriilip 1-at 2014 tikitsinnagu.

Partiit tamarmik issiatitaqassapput 
- Immikkut ilisimasallit sulineranni tamat naalakkersueqataanerat qulakkeerniarlugu naalakkersuisut naalakkersuinikkut malinnaasussanik pilersitsipput Inatsisartuni partiinit tamanit inuttalerneqartumik. Aamma aatsitassarsiortut peqatigalugit tusarniaanerit ingerlanneqartarnissaat pilersaarutigineqarpoq tusaniaasoqartarlunilu inuutaasut aallartitaasa peqataaffigisaannik, Maliina Abelsen nalunaarpoq.

Immikkut ilisimasallit siulittaasuat ilisimatooq Torben M. Andersen aamma nunatsinni aningaasaqarnikkut siunnersuisoqatigiinni ilaasortaavoq aammalu akileraartarnermut atugarissaarnermullu ataatsimiititaliarsuarmi sulinermini nunatsinni aningaasaqarnermik annertuumik ilisimasaqarluni. 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER