- Nunatta qinngasaarutigineqarnera ajoqusiisinnaavoq

Pissusissamisoorpoq qallunaat ministeriunerata apeqqutit suliniutit angisuut pillugit inatsimmut tunngasut akiumanngimmagit. Illuatungiliuttulli qinngasaarinerat ajoqusiisinnaavoq, Socialdemokraatit isumaqarput

Assi: Leiff Josefsen

Dansk Folkepartimiit ministeriuneq Helle Thorning-Schmidt Socialdemokratineersoq sakkortuumik isornartorsiorneqarpoq ministereqatinilu Kalaallit Nunaanni suliniutinut angisuunut inatsimmut aaqqiagiinngissutaaqisumut tunngatillugu ataatsimiititaliamit apeqqutit arlallit akiumanngimmagit.

Inatsit pillugu illuatungiliuttunit apeqquterpassuit qinngasaarinertut ajoqutaasutut taaneqarsinnaapput. Suliaappummi kalaallit namminersulernerminni suliassaqarfiinut tunngasut.

Taamaattumik pissusissamisoorluinnarpoq miniteriunerup apeqqutit akiumanngippagit, Socialdemokratit nunarput pillugu oqaaseqartartuat Flemming Møller Mortensen isumaqarpoq.

- Apeqquterpassuit qinngasaarinertut ipput, kalaallillu isaannit isigalugit pissusissamisoornatik.

- Suliniutit angisuut pillugit inatsimmut tunngatillugu suliaq nunap iluani suliassanngortinneqarpoq, oqaaseqaaterpassuillu kalaallinut akornusiisinnaapput, Flemming Møller Mortensen oqarpoq.

Illuatungiliuttut isornartorsiorpai kalaallit qallunaallu akunnerminni sulineranni qalliuniartutut inissimmata.

- Kalaallit namminersornerannut paasinninnissaq ataqqinninnissarlu pineqarpoq. Maani parteeqarunarpoq kalaallinut qalliuniartuartunik, oqaaseqartartoq oqarpoq.

Kuupik: Qallunaat akuliunnerat ajornartorsiutaavoq
Naalakkersuisut siulittaasuat Kuupik Kleist Inuit Ataqatigiinnersoq tusagassiuutitigut nalunaarummi allappoq qallunaat naalakkersuinermik suliallit suliniutit angisuut pillugit inatsimmi annertuallaamik akuunerat ajornartorsiutaasutut isigigini.

Kuupik Kleistip nalunaarummi eqqarsaatigaa nunatsinni suliniutit angisuut aallartinneqartinnagit qallunaat inatsimmik allanngortitsinissaat pisariaqartoq.

- Naalakkersuisut isumaqarput nunanit allamiunut inatsit allaffissornikkut allanngortilaagassaasoq Folketingemit isummerfigineqartussaq, tassaasariaqarnanili qallunaat nunap iluani pissutsinut atatillugu qinngasaarutissaat.

- Taamaattumik naalakkersuisut kajumissaarutigaat namminersorneq pillugu inatsit ataqqillugu kalaallit inatsisartuisa tamat naalakkersueqataanerannik tunngaveqartoq aalajangigaat taperserneqassasoq, taamaalillutillu nunanit allaneersut pillugit inatsimmi allanngortariaqartut akueralugit, Kuupik Kleist allappoq.

Suliniutit angisuut pillugit inatsisip nunarput nunat allamiut aatsitassarsiortuinut uuliasiortuinullu soqutiginalersissavaa, taakkuni nunatsinni milliardilikkaanik aningaasaliiniarlutik utaqqiinnarput.

Powered by Labrador CMS