Kalaallit palasiat kalaallisut oqalussinnaassaaq
- Soorunami palasi kalaallisut oqalussinnaassaaq, Siumumiit Doris Jakobsen oqarpoq. Tamanna ilageeqarnermut ministerimut Manu Sareenimut erseqqissarpaa
Århus Stift nalunaareersorlu kalaallinut Danmarkimi najugaqartunut palasitut atorfik nutaaq palasimik kalaallisut oqaluttumik inuttalissallugu pisariaqanngitsoq Doris Jakobsen Siumut sinnerlugu Folketingimut ilaasortaq isumaqarpoq ilageeqarnermut ministerimut Manu Sareenimut Radikalineersumut erseqqissartariaqarlugu soorunami kalaallit palasiat kalaallisut oqalussinnaasariaqartoq:
- Atorfik pilersinneqaqqammerpoq kalaallit Danmarkimiittut misigisarmata ilageeqarnikkut oqaatsitigut ajornartorsiuteqarlutik. Ingammik tarnikkut kiffartuussinermi ajornartorsiutaavoq qallunaatut oqaluppiarsinnaannginneq aporfiusarmat imaluunniit pitsaasumik attaveqatigiinnissamut akornutaalluni. Pingaaruteqarluinnarpormi palasinngortussap kalaallisut oqalussinnaanissaa. Allatut iliorneq atorsinnaanngilaq, Doris Jakobsen oqarpoq.
Læs også: Grønlandsk præst på vej i Danmark
Palasit kalaallisut oqalussinnaasut qinnuteqanngippata Doris Jakobsenip siunnersuutigaa Ilageeqarnermut ministereqarfimmiit nunatsinniit qinnuteqartup pigisaasa nuunnissaannut aningaasaliisoqassasoq.
- Suli nunatsinni palasinut atorfeqarpoq inuttalerneqarsimanngitsunik, paasisakkali naapertorlugit innuttaasut tamarmik kiffartuunneqarput. Naak Danmarkimi kalaallinut palasip kalaallisut oqalussinnaanissaa pitsaanerpaassagaluartoq aallaqqaammut pisariaqarsinnaavoq nunatsinnit qinnuteqartussamik pissarsiornissaq, Doris Jakobsen oqarpoq.