Tv-mi pisortaq soraarsinneqarpoq
Soraarsitsineruvoq. Tassalu Nuuk TV-mi pisortap Jens Olsenip erngerluni suliffimminit tunuartitaaneranut pissutaasoq
Jens Olsen Nuuk TV-mi pisortaajunnaarpoq.
Ataasinngornermi tassanngaannaq nalunaarutigineqarpoq pisortaq erngerluni suliunnaarsinneqartoq.
Jens Olsenimullu tamanna tupaallaataanngilaq:
- Siulersuisut ukiuni marlunni tamanna sulissutigaat. Isorisassaqarsimanngillat. Suut tamarmik ajunngitsumik ingerlapput. Taamaakkaluartoq suleqatigiinnermik ajornartorsiuteqartoqarnerarpaat, Sermitsiaq.AG-mut oqarpoq.
- Eqqumiippalungaarami. Sugavit?
- Siulersuisut taama aperiniakkit. Ukiuni kingullerni 13-ini annertuumik pilersitsisimavugut. Siornali siulersuisullu aaqqiagiinngissuteqalerpugut, taakkumi piginnittussaanermut akit qaffannerat missingersuusiornermut atatillugu akueriumanngilaat. Taamaattumik amigartooruneqarpugut. Aarlerinartoqanngilaq, peqatigiiffiuvugummi aningaasaateqarluartoq, siulersuisulli sukujunnik ujaasillutik soraarsinnissannut peqqutissarsiorput, Jens Olsen oqarpoq.
Læs "Nuuk TV dropper direktør"
Atorfissaaruppit
- Tupappit?
- Ajornerusunik misigisaqartarsimavunga. Aamma atorfissaarutinngilanga. Takussavarput ilaasortat siulersuisut aalajangernerat qanoq igineraat.
- Isumaqarpit ilaasortat aalajangiineq allanngortinniassagaat?
- Siulersuisut aalajangernerat ataqqisariaqarpara. Taakkuli aamma ilaasortanut akisussaapput.
Siulittaasoq: Suleqatigiinnermik ajornartorsiuteqarpugut
Nuuk TV-mi siulersuisuni siulittaasup Orla Dalagerip 'suleqatigiinnermik ajornartorsiuteqarneq' sorpiaanersoq nassuiarnianngilaa.
- Amigartoorujussuarnissamut attuumassuteqarpa?
- Naagga, tamanna tusarsimanngilara, akivoq.
Siulersuisut siunissami kina ulluinnarni aqutsisuunissaa pillugu aalajangernissaasa tungaanut sulisut siulersuisuni sinniisaat Jacob Olsen aqutsisuugalassaaq. Aamma Orla Dalager pisariaqartillugu aqutsinermi akuunerussaaq. I